ميسي أفضل لاعب في التاريخ

الحكاية كلها ميسي!

اللي بيعمله ميسي في العمر ده شيء غير قابل للتفسير، مش فكرة أرقام بقى وإحصائيات، ولا حتى الأداء نفسه.
حضّر قهوتك وتعالى، وسيبلي دماغك خالص!

تعالى ناخد الموضوع من تحت لفوق؛ اللي بيعمله ميسي في المطلق محتاج ليونة جسم وسرعة تنفيذ وحالة بدنية ممتازة، مش طبيعي إنهم يكونوا موجودين عند لاعب كورة في السن ده،

فـ حتى لو قولنا خلايا وأعصاب ميسي العقلية بإستمرار في إنتاجية تفكير أسرع من غيره، ده مش طبيعي يتنفذ كده،

النماذج الممنهجة أو الهجين بين اللاتينوس والنظام الأوروبي زي ميسي كده، كلهم بلا إستثناء خلّصوا كورة قبل سن ميسي الحالي بـ5 سنين مثلًا، شيء طبيعي جدًا لتفتت العضلات دي ومذاكرة منهجية اللاعب ده بمرور الوقت،

الوضع مع ميسي معكوس بقى؛ اللاعب عمومًا بيكرّس سنين عمره علشان يوصل من المرحلة الواعية للمرحلة غير الواعية،

إنه في الموقف ده هيعمل قرار هو مش عارف سبب إتخاذه ايه غير إن فِطرته وحدسه ومخزون المواقف أنتج مرحلة غير واعية من القرار،

ميسي حالة نادرة، ميسي كان مش محتاج يوصل للمرحلة دي من الكورة لأنك لو فتحت يوتيوب وشوفته من وهو طفل صغير هتلاقيه بيعمل كل ده بنفس سرعة القرار والمرونة والإستمرارية من أول لحظة له في الكورة!

علشان كده ميسي وصل للمرحلة الواعية بقى، إنه غير واعي بكل اللي بيعمله، لكن لما بيقرر شيء بعينه بيعمله بنفس سرعة القرار اللي عقله الباطن أخذه،

عبقرية فذّة يعني، عقلك الباطن ده جوهر عبقريتك وذكاءك، فأنت بتعلّي عليه! وعلشان كده ميسي بمرور السنين مستواه كان مش بيقل ولا حاجة، بل العكس!

عايز أسحلك معايا لتكوين ميسي عمومًا، لأنه أغرب تكوين حصل في تاريخ كل الرياضات،

الفلترة اللي بتحصل لكل لاعبي كرة القدم شيء خارق إنها معرفتش تسيطر على النقطة دي مع ميسي، مش بس تخلّيه أفضل وأنضج بمرور الوقت، مش منطقي تحديدًا مع ميسي لأنه بيعمل نفس اللي بيعمله لأكتر من 20 سنة،

كل لاعيبة العالم الممتازين بيوصلوا عند وقت معين بعد التألق ومستواهم بيقل تدريجيًا، مش علشان هم أصبحوا أقل أو لأنهم أصبحوا مش عارفين يعملوا اللي بيعملوه، لكن علشان اللي بيعملوه أصبح أقرب للتوقّع والدراسة، والأهم.. الإختزال،

الطبيعي إن لاعب الكورة لما بيبدأ مسيرته بيكون عبقري ويجرب أكتر من حاجة، علشان كده المواهب الصغيرة بيتدفع فيها أرقام خارقة، لكن بمرور الوقت، بيكون فيه إعتقاد إنهم مقلب،

لا هم مش كده، هم بيتم إختزال قدراتهم لأن عقلهم الباطن بيقرر يكرر نفس الحاجة اللي أبدع فيها بعينها، ويختزل الحاجات التانية،

الدائرة دي ميسي مش بس كان عكسها، بل إنه بمرور الوقت كان بيضيفلها نضج ووعي وشمولية وهو بيكبر، اللي هي المعادلة وعكسها زي بداية البوست!

• لو شوفت مراحل تكوين ميسي في اللعبة عمومًا، هتشوف نسخ مختلفة للاعب بيعمل نفس اللي بيعمله بالظبط واللي إتدرس وإتهرس من الخصوم بس محدش عرف يعمل معاه حاجة،

هي دي المرحلة غير الواعية اللي يوصلها الكل بعد سنين إجتهاد وخبرة، ميسي علّى عليها بشكل واعي؛ بدأ في 2008 كأفضل جناح شهدته اللعبة على الإطلاق،

طاقة تسارعية وليونة وسرعة تنفيذ بيخلّوه حتى وهو بعيد عن مواقع التزاحم يتدخل في اللعبة ويشكّل خطورة وينقل رقابة الخصوم بنفسه،

علشان يكون مهاجم وهمي في 2011، كل ده بيتنقل من الطرف للعمق، بس هنا زاد عليه أنماط اللعب والتحكم في كل هيكل بيحصل مع اللاعبين،

علشان في 2015 يكون مفيش منظومة حتى، بس فيه إتنين معاه هو اللي بيمثّل أنماط اللعب معاهم، ومش بس كده، بيسجل ويصنع ويبقى الأول وبفارق ضخم بعده،

علشان في 2019 حتى الإتنين دول ميبقوش موجودين، فـ يكون هو النادي كله، والباقي حجر، مسؤولية زادت والتألق زاد، مش العكس،

علشان بعدها حتى الحجر ده برده ميكونش موجود، ويطلعوله شوية عيال من لامسيا على كام تعاقد مجاني من فرق وسط جدول، فيقدم نفس اللي يقدمه،

علشان مع الأرجنتين برده مع شوية عيال ولاعبين هو اللي بيرفع مستواهم يحقق بيهم كل المجد،

علاقة عكسية إستهلاكية لميسي عكس اللي بيحصل مع أي حد في الدنيا، بس الغريب، إن كل ما حجم المسؤولية زادت، كل ما هو تألق!

في رأيي وصف إن ميسي أفضل لاعب في التاريخ ده بيقلل منه مش بيتوّج اللي عمله، لأن وقتها هيتحط في معادلة فيها أطراف من باقي اللاعبين مهما كان حجمهم،

ميسي حاجة تانية خالص، معادلة بكامل أطرافها غير قابلة للحسابات حتى.

sportnews.it.com