عبد الصمد الزلزولي مقدم موسم مبهر في كل شئ حقيقي

هو اه عبد الصمد الزلزولي مسجلش و مصنعش اهداف النهاردة امام ريال مدريد ، بس انا حسيت اني بتفرج علي نسخه مختلفه و متطوره جدا من الزلزولي !

عبد الصمد الزلزولي مقدم موسم مبهر في كل شئ حقيقي ، قبل كدة كان بياخد قرارات عشوائيه و عينه في الارض دايما بعد استلام الكرة ، لكن دلوقتي اصبح لاعب بيتحكم في رتم الهجمه في التلت الاخير و رافع عينه طول الوقت و اغلب قراراته منتجة و بتخدم الفريق !

يعني لو جيت بصيت علي اللقطه اللي قدامك دي ، الزلزولي هنا شد الفريق للتلت الاخير و بعدها وقف علي الكرة و وهم روديجير انه هيمرر للخلف لكنه مرر بشكل بيني ل مارك روكا و صنع فرصه عظيمه من العدم فعلا !

الزلزولي نفسه طلع قال انه بيشتغل يوميا علي كل التفاصيل الصغيره من غير ما يندفع و يرهق نفسه ، عشان كدة الزلزولي مساهم ب 21 هدف كاكتر موسم في مسيرته ساهم فيه باهداف ، كمان هو اكتر لاعب صنع فرص محققه للتسجيل لريال بيتيس في الليجا ب 10 فرص !

برشلونة بقي عنده فرصة ذهبية في الميركاتو لو مقدرش يدفع مبلغ كبير في جناح شمال لانه بيمتلك 50% من حقوق الزلزولي و يقدر يرجعوا من بيتيس بمبلغ اقتصادي

ده غير ان الزلزولي لسة 24 سنة و دي لوحدها ميزه

المشهد العجيب اللي قدامك ده حصل النهاردة في مباراة ريال مدريد و ريال بيتيس و بيشرح حال ريال مدريد في اخر سنتين !

اللي حصل في المشهد ده ان بيلينجهام حول اللعب تجاه ارنولد في الجانب الايمن ، في نفس اللحظه دي مبابي و فينيسيوس اتحركوا الي منطقه الجزاء بس شوف العجب بقي ، الاتنين اتحركوا تجاه نفس المساحه ف اتولد لينا منظر البلايستيشن ده !

لو عايز تضحك بقي ف مبابي و فينيسيوس في اخر موسمين ساهموا مع بعض ب 6% بس من اهداف الفريق ، الاتنين صنعوا 12 هدف لبعض من اصل 262 هدف سجلهم الفريق !

ده غير ان ريال مدريد بيسجل اهداف في وجود واحد منهم فقط اكتر من وجودهم مع بعض ، كمان نسبة فوز ريال مدريد بتوصل الي 69% في وجود واحد منهم ، في المقابل بتنزل الي 62% في وجودهم مع بعض ، اظن شرحت نفسها خلاص !

ريال مدريد كان عنده افضل جناح ايسر في العالم و جايب دوري ابطال اوروبا بدراعه ، بدل ما يجيب له مهاجم شامل زي هاري كين

راح جاب مبابي اللي بيهموا مصلحه نفسه فكانت النتيجة ان ريال مدريد كون اسوا ثنائيه هجوميه و خسر مركز المهاجم و خسر الجناح الايسر و خسر توازن الفريق و خرج ب اتنين موسم صفري !

اللي حصل النهاردة في مباراة ريال مدريد و ريال بيتيس هو قمة العدالة حرفيا !

ريال مدريد ميستحقش ابدا الدوري ده بكل المقاييس ، فريق اطفال ميعرفش يعني ايه مسئوليه و كل لاعب بيلعب لنفسه و مش مهم خالص الفريق !

بيتيس النهاردة كان سهل اوي يسجل هدف و اتنين في ريال مدريد من اول شوط كمان لولا لونين اللي شال المباراة حرفيا ، ده حتي اللعيبه مش هاين عليها تعترض علي الحكم في اي قرار ، رميت راية الموسم كلها !

فريق بيتمشي و مش بيضغط ، فريق مبيحترمش الكورة ولا المنافسين ، توظيفات كارثيه لكل لاعب ، كل لاعب فاكر نفسه نجم زمانه

فكانت النتيجة ان ريال مدريد خرج بموسم صفري للمرة التانيه علي التوالي !

جمهور برشلونة يقوم يحتفل بالدوري من دلوقتي لان برشلونة لو فاز علي خيتافي بكرة هيوسع الفارق الي 11 نقطه و لو كسب مباراة كمان عنده فرصه ذهبيه يحسم الدوري رسميا

في مباراة الكلاسيكو في لقطه هتكون للتاريخ ، دوري مستحق جدا لبرشلونة

sportnews.it.com