مباراة باريس و بايرن ميونيخ هي مباراة بعنوان كرة القدم فقط

لو عايز تعرف قيمة اللي قدموه باريس و بايرن ميونيخ النهاردة ، شوف الصورة اللي قدامك دي !

الصورة دي نزلها النهاردة ايرلينج هالاند و هو بيتفرج علي المباراة و كتب جملة بتقول ” هذه هي كرة القدم ” ، جملة بسيطة بتلخص المباراة كلها !

المباراة دي مستمتعش بيها الجمهور فقط ، لا ده كمان في لعيبه استمتعت جدا بالعرض الخيالي ده ، اولهم هالاند ، ثانيهم ماركينيوس اللي قال هذه هي المباريات التي تحلم ان تراها خلال العام ، كمان هنري اللي قال كنا نعتقد ان كرة القدم اصبحت مملة لكن اليوم انا استمتعت بشده !

و بالمناسبة دي بقي ف انا حابب اشكر الشخص صاحب فكرة الغاء قاعده افضليه الهدف خارج الارض ، القرار ده خلي اغلب الفرق شجاعة و بتفتح الملعب و ده خلانا نشوف مباريات تنافسيه مرعبه زي برشلونة و انتر ، و النهاردة باريس و بايرن ميونيخ !

مباراة باريس و بايرن ميونيخ هي مباراة بعنوان كرة القدم فقط

في تفصيلة ذكية و مهمة جدا عملها فيتينيا النهاردة في الهدف الرابع لباريس بتثبتلك انه لاعب وسط كما يقول الكتاب !

فيتينيا قبل ما يعمل التمريره ل فيتينيا عمل فينت عبقري غير المشهد كله 180 درجة ، فيتينيا وهم لاعبي بايرن ميونيخ انه هيمرر ل ديسري دوي بين الخطوط ، الفينت ده نتج عنه حاجتين !

الحاجة الاولي ان لويس دياز اللي كان واقف علي الخط و بيراقب حكيمي دخل للعمق عشان يعترض التمريره و ترك حكيمي ، و التانيه هي ان لايمار انجذب خلف دوي و ترك المساحه خلفه !

فكانت النتيجة ان اشرف حكيمي رصد المشهد بذكاء و انطلق في المساحه بدون رقابه و فيتينيا كمل عبقريته بتمريره خياليه عشان حكيمي يصنع الهدف الرابع ل كفاراتسخيليا !

العالم الموازي اللي احنا عايشين فيه بقي ان باريس اشتري فيتينيا من 4 سنين ب 41 مليون يورو فقط ، في المقابل ريال مدريد في نفس السنة اشتري تشواميني ب 80 مليون يورو يعني ضعف تمن فيتينيا ، قمة العبث في كرة القدم !

انا حقيقي مش قادر اتخطي جمال تمريره هاري كين في الهدف الرابع !

الراجل ده رسم الهدف الرابع كله رسمه فاخره ، نزل لحد دائره وسط الملعب ، اتحرك عكس اتجاه الضغط و طلب الكرة في المساحه ، مجرد استلام بالقدم البعيده مع نصف دوران و بدأ السيمفونية !

دي تمريرة متطلعش غير من لاعب وسط جبار زي بيدري او فيتينيا ، انما تطلع من مهاجم صريح انت كدة بتسرح بينا فعلا ، تمريره مقوسه للخارج مظبوطه كوزن و توجيه قال ل دياز روح هات هدف يلا ، جودة خياليه !

هاري كين ده تعريف الشمولية في ملف المهاجمين ، احنا بنتكلم عن مهاجم ساهم ب 61 هدف في الموسم و في نفس الوقت بينزل لنص الملعب يطور هجمات و يصنع لعب و يخلي الاجنحه تسجل اهداف و بعدها ينزل للتلت الدفاعي و يقدم معدلات ركض مهوله و يسترجع الكرة ، مفيش منه غير نسخه واحده في العالم !

هاري كين يستاهل يكسب دوري ابطال اوروبا و يستاهل يطلع بثلاثيه و يستاهل يشيل بالون دور في ايده لانه اولا بيخلي نفسه لاجل فريقه و ثانيا عامل موسم تاريخي بكل معني الكلمة

فرق اوروبا كلها زمانها دلوقتي ندمانه اشد الندم و بتخبط كف علي كف بسبب ضياعهم للصفقه الذهبيه دي !

اصل انت بتتكلم عن جناح شامل مفيش حاجة مبيعرفش يعملها ، حتي هتلاقيه اول واحد بيرجع يدافع و يسترجع الكرة ، و في نفس الوقت عامل مشاكل مع نابولي و عايز يمشي ، صفقه لقطه من الاخر !

راح دخل باريس السوق لوحده و دفع 80 مليون يورو و كسب افضل جناح ايسر في العالم عشان كفاراتسخيليا النهاردة يدخل التاريخ من اوسع ابوابه لانه اصبح اكتر لاعب ساهم باهداف في تاريخ باريس في نسخه واحده من دوري ابطال اوروبا ب 15 هدف !

و لو عايز تتفرج علي جنان فعلا فالراجل ده سجل في كل الادوار الاقصائيه ، امام بايرن ميونيخ و ليفربول و تشيلسي و موناكو ، و لو عايز جنان تاني فالراجل ده سجل 10 اهداف في دوري ابطال اوروبا من 3.8 هدف متوقع فقط ، من فخامه و دقه تسديداته قدر يسجل 6 اهداف زياده عن الطبيعي و بكلتا قدميه كمان !

الكره الافريقيةلا ديمبيلي ولا ديسري دوي ، كفاراتسخيليا هو نجم باريس الاول في الموسم الحالي ، واحده من اقوي و انجح الصفقات اللي عملها باريس في تاريخه حرفيا

لا بس الفخامة اللي عملها لويس دياز في الهدف الرابع مسكوت عنها شوية و مش واخده حقها فعلا !

لو جيت سألت اي مشجع قبل المباراة دي هيقولك و هو مغمض ان لويس دياز هو اقل جناح بين الاجنحه الاربعه بتوع الفريق المتمثلين في اوليسيه و كفاراتسخيليا و ديسري دوي !

بس الراجل ده اثبت النهاردة انه جناح حريف و ذكي و مبدع و عنده شخصيه و ميقلش حاجة عن الاسماء الباقيه ، كفايه بس انه فتح المباراة لبايرن ميونيخ و شال الكرة من منطقه الجزاء للتلت الاخير و راوغ كل لاعب قصاده و كسب ركلة جزاء من العدم كانت سبب في هدف بايرن الاول !

الهدف الرابع بقي قصه تانيه خالص ، دياز اولا اتحرك من الجانب الاعمي ل ماركينيوس ، ثانيا استلم الكرة بقدمه القريبه عكس اتجاه تحركه عشان يفرق بمسافه عن ماركينيوس ، ثالثا عمل الفينت الشوارعي اللي قدامك ده عشان يفتح زاويه التسديد ، رابعا سجل هدف ملوكي بكل تفاصيله !

قالوا ان بايرن ميونيخ اتضحك عليه في الصفقه دي ، النهاردة بيرد علي الكل ب 49 مساهمه تهديفية و بيسجل في باريس مرتين و في ريال مدريد مرتين و هو احد اسباب موسم بايرن ميونيخ الناجح ، انتم في حضره لويس دياز

انا حقيقي مصعبش عليا حد في مباراة باريس و بايرن ميونيخ غير فينسنت كومباني !

باريس لما سجل الهدف الخامس الكاميرا جات علي كومباني و هو بيفرك خلاص و عايز ينزل يحل الازمه دي ، بس مش عارف يعمل كدة بسبب مراقب اللجنه اللي قاعد جنبه ده و القوانين اللي فصلته عن فريقه و حولته الي متفرج فقط !

بس الصورة دي لازم يفتخر بيها كل مشجعين بايرن ميونيخ لان في وسط ما كومباني مشاركش في اي شئ في المباراة و كل القرارات كان بياخدها المساعد لوحده و كمان بتلعب امام باريس اللي عنده اقوي لعيبه في كل الخطوط و كمان بتلعب علي ملعبه و كمان مش معاك جنابري و كارل بين الخطوط !

الا ان شخصيه بايرن ميونيخ كان حاضره بشكل جبار و عملوا تلت ساعه عظيمه في البداية لدرجه ان باريس مطلعش ولا مرة من ضغط بايرن و في الشوط التاني بايرن هيمن تماما و قدر يرجع بهدفين و عموما صنعوا 6 فرص محققه للتسجيل و كان حقهم يتعادلوا لولا ضياع الفرص !

تخيل ان كل ده حصل و كومباني مشاركش ، امال لما يشارك في العوده و علي اليانز ارينا هيعمل فيهم ايه ، كومباني هو اكبر مكسب حصل لبايرن ميونيخ حرفيا

انا مش هبالغ خالص ، بس مباراة باريس سان جيرمان و بايرن ميونيخ النهاردة هي واحده من اقوي و امتع المباريات اللي حصلت في تاريخ كرة القدم !

دي اكتر مباراة نفسنا هنج فيها من كتر الضغط و التحولات اللي حصلوا فيها ، بايرن ميونيخ يسجل هدف و بعدها اوليسيه يضيع انفراد ، ترد لباريس و ديمبيلي يضيع انفراد و بعدها كفاراتسخيليا يسجل التعادل و نيفيز يسجل التاني !

اوليسيه يضيع كرة في العارضه و بعدها يتمنظر امام المرمي مع موسيالا ، ف ترد لباريس و ديسري دوي يضيع انفراد ، ف ترد ل اوليسيه عشان يسجل هدف اسطوري و بعدها ب دقيقتين ديمبيلي يسجل التالت لباريس ، دراما علي اصولها !

الجنان موقفش لحد هنا لان الشوط التاني كان قصه مرعبه لوحده ، باريس يسجل هدفين ورا بعض بتحولات و النتيجة تبقي 5 / 2 و الكل يفتكر انه خلاص باريس اكتسح بايرن ، يروح بايرن هو اللي يكتسح باريس في الشوط ده و يسجل هدفين في 3 دقائق !

مباراة مفتوحه و مليانه مساحات و فيها 9 اهداف و كورة نضيفه و سريعه و سيناريو مليان اثاره و تشويق ، باريس و بايرن ميونيخ قدموا مباراة اسطوريه التاريخ مش هينساها حرفيا

sportnews.it.com