الإستلام وتكنيك التسديد قمة الجمال ، وده اللي خلى الكرة تخرج بالقوة والدقة دي لدرجة إن كورتوا ما لحقش يتعامل معاها أو حتى يشوفها وياخد رد فعل أفضل.

هفضل مقتنع إن إمام عاشور بيمتلك إمكانيات تخليه يلعب في أوروبا بأريحية كمان، ومش ببالغ لان إمام لعيب جودته عالية عنده الجودة الفنية والقدرات البدنية اللي تسمحله ينافس على أعلى مستوى.

لو كان ركز أكتر على تفاصيل التطور والإستمرارية وعقلية الإحتراف، خصوصًا فترة ميتلاند ، وكان داس على نفسه أكتر واتعلم لغة ، كان يقدر يوصل لمرحلة أكبر بكتير. والموضوع والله ملوش علاقة بأهلي ولا زمالك أنا بتكلم عن تجربة كانت هتنور في أوروبا.

كان يقدر يحقق نجاح أكبر وينور في ملاعب وأندية أوروبا، لأن في النهاية العقلية هي مربط الفرس، وده اللي مخلي صلاح مختلف عن أي لاعب تاني ومكمل للنهاية.

ماتش كبير من محمد صلاح انهارده. دور صلاح ماكانش مجرد جناح أو لاعب بيستنى الكرة في الثلث الأخير، لكنه كان المحرك الأساسي للمنتخب في نقل الكرة ما بين الخطوط وعلى الأطراف، وكان حلقة الوصل الأهم في الخروج بالكرة.

صلاح لعب كـ Roaming player ، تحركاته كانت بإستمرار في أنصاف المساحات وما بين الخطوط، وده كان هدفه الربط بين خطوط المنتخب وتسهيل عملية التدرج بالكرة.

السبب في نجاحه بالدور ده إنه ببساطة أفضل لاعب في المنتخب في الإستلام تحت الضغط والتحرك بين الخطوط. يقدر يستلم بوضعيات صعبة ومحجوبة، وتسند عليه وهو مضغوط وينقلك الكرة للأمام بكل أريحية وكان دايمًا بينزل لثلث الثاني علشان تطلع عليه.

أكتر حاجة عجبتني في صلاح النهارده كانت سرعة إتخاذ القرار.
لعب من لمسة كتير، وباصات سحرية وقدر من خلالها يوصل المنتخب بسهولة للثلث الأخير ومنها كرة الهدف.

جيم تكتيكي كبير جدًا من صلاح، وواحد من أفضل مبارياته مع المنتخب بدون مبالغة. عاش يا صلاح

sportnews.it.com