مهاجم قوي جدًا ضمن صفوف الغزلان

فرانك بولي

وادي دجلة هتفضل واحدة من أنجح المنظومات الكروية في مصر طول ما فيه عقلية بحجم المهندس ماجد سامي بتدير النادي بالشكل ده، لأن الراجل مؤمن بالتخصص بشكل عام ودي نقطة فارقة جدًا.

مدير فني ليه صلاحياته، محلل أداء ليه شغله، مدير رياضي ماسك المنظومة كلها ، وكل فرد شغال في اختصاصه بدون تدخلات وده بيخلق بيئة مستقرة تساعد أي لاعب ينجح ويتطور.

الإيفواري فرانك بولي كان واحد من التدعيمات المهمة اللي عملها النادي، والحقيقة إن الصفقة بدأت تظهر قيمتها بشكل واضح جدًا مؤخرًا.

في البداية اندماجه مكانش سريع بالشكل المتوقع لكن مع الوقت والدقائق قدر يثبت نفسه ويبقي عنصر مؤثر جدًا هجوميًا.

بولي رغم إنه داخل علي ٣٢ سنة تقريبًا لكنه مهاجم بخبرات ضخمة جدًا ولسة عنده جودة واضحة جدًا داخل الملعب، مهاجم قوي ورخم علي أي دفاع ولمسته حلوة جدًا والأهم إنه مباشر بشكل كبير إتجاه المرمي ودي ميزة مش مهمة.

المهاجم الإيفواري لعب في تجارب مختلفة جدًا ما بين النرويج والمجر وأمريكا والمكسيك

وكمان شارك أوروبيًا في دوري الأبطال والدوري الأوروبي، ودي نقطة بتفرق جدًا مع أي مهاجم لأنه بيبقي متعود علي مدارس وأساليب لعب متنوعة وده بيدي لأي مدرب مرونة كبيرة في استخدامه.

بولي عنده أكتر من ١٦٠ مساهمة تهديفية خلال مسيرته وده رقم يعكس حجم خبراته وتأثيره الهجومي، خصوصًا إن أغلب مشاركاته كانت كمهاجم صريح وده مركزه الأساسي.

الجميل كمان إنه مش مجرد مهاجم صندوق تقليدي، بالعكس عنده تنوع كبير في التحرك ويقدر يلعب كجناح شمال أو مهاجم متأخر لكن أفضل نسخة ليه دايمًا بتكون لما يتحط قريب من المرمي كمهاجم.

اللي يميز بولي إنه مهاجم قوي جدًا تجاه المرمي، بيحب الحل السريع والتسديد المباشر وعنده قوة بدنية كويسة وتحركات مزعجة جدًا لأي خط دفاع ، كمان بيعرف يتعامل مع الضغط والالتحامات ويكسب الكرة الثانية بشكل ممتاز.

قيمته السوقية الحالية 800 ألف يورو حسب ترانسفير ماركت، والأجمل إن وادي دجلة ضمه في صفقة انتقال حر، ودي تحسب للإدارة جدًا.

مهاجم قوي جدًا ضمن صفوف الغزلان

sportnews.it.com