جيزفالدو فيريرا الشمعه المضيئة الأمل الوحيد

” على الرغم من أنه لم يكن نوع مدربي ، لكنه كان معلما حقيقيًا لكرة القدم ، لقد كان المدرب الذي جعل اللاعبين يتطورون أكثر ، على سبيل المثال ، لم يكن الاعب هو نفس اللاعب بعد ثلاثة أشهر من وصوله ، وذلك بفضل العمل الذي قام به جيسوالدو مع لاعب ، من حيث تطوير اللاعبين وتحسينهم ، كان أفضل مدرب رأيته “

• بنيتو دا كوستا رئيس بورتو التاريخي

” العقلانية + المنطق = شغل واقعي ، نتائج إستثنائية خلال فترة زمنية أقل بل تحقيق أهداف غير متوقعة “

المعادلة البسيطه دي الراجل الي قدامك أشتغل عليها

لو سالتني مين الجندي المجهول والسبب في كل خطوه كويسة الزمالك حققها 2021 علطول بدون تفكير هيبقي “جيزفالدو فيريرا” الشمعه المضيئة – الأمل الوحيد اللي قادر يحقق التارجت بشكل مش متوقع بقائمة هشه ، صاحب كل تطوير ، كل بصمه حلوه بنوصلها .

تخيل لو كمل معانا من 2014 كان وضعنا اي دلوقتي بس يلا ما علينا حسبي الله ونعم الوكيل في الإدارة الفاسدة .

( إدارة الازمات )

كيفية “إداره الازمات ” محتاجه رجل صاحب ذكاء وفكر عالي جدا ويبقي “واقعي” ويستغني عن “قناعاته ” لتفادي اي ‏خساره وفيريرا نجح فيها وهنشرح بالتفصيل ازاي .

قهوتك ويالا بينا المهم تقعد وتتمتع ي صديقي ، كلامي ملوش علاقة بتحقيق الدوري وقتها بالعكس ، هوا علي الفتره كلها لفيريرا

صلي على النبي الاول

فيريرا جه الزمالك والنادي هش ، معندوش لاعيبة كتير أو بمعني أصح قائمة قوية تناسب طموحات النادي تقدر من خلالها تنافس علي كل البطولات تقدر تجاري خصمك وتتساوي شوية ولكن الفجوه كانت كبيرة ما بينكم ولصالح الخصم للأسف .

مكانش عندنا اللاعب المرن تكتيكيا اللي قادر ينفذ أفكار المدرب ، لاعيبه متكامله ودا شيء نادر ، عشوائيه بدرجه مرعبه متتوقعش فريق بحجم الزمالك بينزل صفر تكتيكات ، صفر انماط لعب ” لاعيبة جودته وفنياته ضعيفه جدا

الفريق كمان كان ضعيف في عمليات الضغط واستقبال اللعب وكل لاعب مشتت ذهنيا ومش قادر يحقق المطلوب والفريق بيستقبل اهداف بطريقه غريبه..!

( فترة الضياع )

الزمالك في الفترات ما قبل فيريرا كان مهلهل وفريق مبني علي حالة الافراد فقط لو ذهنيا ونفسيا حاضرين وجاهزين هنكسب ولكن كتيم أنسي يا معلم وهي مشكلة صعبة جدا لان كرة القدم لعبة جماعية
والعشوائيه عندك اسلوب حياه.

( بداية التجديد – فتره نقاء )

بعد عوده المنقذ / البروفيسير / دكتوراه إدارة الازمات زي ما عايز تقول قول يا سيدي ، بعد عودة جيزفالدو فيريرا اللي يعتبر الامل الوحيد وكلمه السر خلال الفتره وله نصيب الاسد في الحاله الفنيه والزهنيه اللي وصلها الفريق

كمنطق محدش كان عنده أمل ولو بنسبه 1% اننا نوصل للمرحله دي وننافس ونحقق بطوله كمان علشان كدا ده بالنسبالي لقب إستثنائي

كم تحديات كبيرة كانت موجودة ومع ذلك قدم أداء مميز ، تدخلاتة الفنيه في كل مباراه ” توقيت ” التبديلات ، “إختيار ” الناشئين وازاي اقدر “ازرع” الثقه في كل لاعب وينزل يلعب بكل روح وعزيمة وشخصية

“الحضور الذهني” اللي كان غايب عن الاعيبة قدر يرجعه “بن شرقي” أقرب مثال رجعه في ظل الظروف الصعبه وانه خلاص ماشي ومع ذلك بيلعب وبيسجل لاخر مباراة ..

الشيء الي وصله الفريق بثابه ” الإعجاز” مشاكل في اوضه اللبس لكن أسلوبه الصارم منعها وحدد قوانين وسيستم للفترة ، مشاكل تجديد ، قيد موقوف ، مستحقات متاخره ، عدم وجود صفقات حرفيا عجز رهيب مين يستحمل وضع زي كدا ؟؟

( مرحلة الإصلاح أو بالبلدي التلصيم كان بيلصم )

لصم الفريق بالمعني الحرفي بـ شويه ناشئين زي ” حسام عبدالمجيد ، محمد طارق ، يوسف اسامه ، سيف فاروق جعفر ، سيد عبد الله نيمار مع ادوار مركبه للخط الامامي بالكامل غير عمليات التدوير

يلا نشرحها براحة

اولا : الفريق بقا عنده هيكل ثابت ونمط لعب وبقا فيه اسلوب واضح صريح الدفاع ككتله وحدها حل مشكله المرجعيه ، التغطية العكسيه ، الافتكاك بشكل صحيح في توقيت مناسب بدأ بقدر المستطاع يقلل العشوائية وأخطاء اللاعيبة الفردية

ثانيا :الأدوار المركبة لكل لاعب ” عبدالشافي مدافع ثالث ، الونش كلاعب ليبرو ، المثلوثي مدافع تالت مساند هنا نقطة تحول المثلوثي سببها فيريرا، محمد طارق باك رايت ومدافع مساند ، محمد عبدالغني بقا يتم إستخدامه ك محور ، روقا احيانا كان بينزل مدافع مساند ،

إمام عاشور جناح وباك رايت مع حرية الحركة في الثلث الاخير ، نيمار وينج باك رايت ، اوناجم وينج باك رايت ، عبدالله جمعه وينج باك ليفت ، اوباما وسط بجانب امام ، يوسف اسامه وينج باك وجناح بالرغم انه مهاجم صريح

شيكا وسط واحيانا كان بينزل مهاجم وهمي لعمل الفوضي مع حريه التحرك في كل الجوانب “يمين/ شمال” .

ثالثا : الهيكل ، الاستراتيجية

إستخدام رسم خططي مناسب ومتوازن في الحالتين الهجومية
والدفاعية وهوا 3-4-3 مش من فراغ شيء عظيم يحسبله

لانك مستخدم نمط ممتاز وقوي في التحولات في المرحله الهجومية انتا بتهاجم كل الممرات الخمسه ومتحكم فيها وبتتحول إلي 3-2-5 كمان قدرت تستفاد من الاطراف عندك بشكل كبير بسبب سرعاتهم العاليه وتفوقهم في المواقف الفرديه 1on1 وعرفت ازاي تنقل
الهجمه من منطقه لمنطقة تانيه .

كمان انتا محقق مباديء كويسة في الانتشار سواء الانتشار في
( العمق depth من خلال شيكا / إمام / زيزو / بن شرقي )

( الاختراق penetration عن طريق الوينجات / الاطراف ،
المسانده support وتحقيق زياده عدديه )

( خلق الفرص creation shape بدات تطور فيها )
‏
بالنسبه للحاله الدفاعية بتتحول إلي 5-2-3 واحيانا إلي 6-3-1 وبكدا انتا محقق زياده عدديه في كل مركز واي تفوق
سواء ” عددي ، نوعي ، مركزي” في صالحك انتا

غير التطوير في مراحل التدرج والتحضير والخروج بالكوره وبناء اللعب السليم كمان فكره تطبيق ال man marking كان شيء كويس أمور عديده الصراحه تطورت ، كمان الدفاع ببلوك متوسط وككتلة وحدها مع تطبيق مصيده التسلل .

غير تغير هيكل الفريق من 4-3-3 ل 4-3-2-1 ل 3-4-3 داخل المباراه متخيل كم الشغل المبزول مع انماط لعب مختلفه ومتغيره داخل الملعب ” مرونة ” كبيرة

( الجندي المجهول مستر روي أجواش )

أحد تلامذه “مانويل جوزيه” اجواش قدر خلال فتره قليله جدا يطور الكرات الثابته والي تعتبر كانت من اكبر مشاكل الفريق ولكن أصبح الزمالك الاقوي فيها بل حقق الدوري من خلالها مباريات عديدة تم حسمها بهدف مسجل من ضربة ثابتة ، كلمة السر أجواش وانماطه

ذكاء فيريرا الشديد كان كيفيه إداره الازمات أهم نقطه ياجماعه إداره الازمات بالشكل المطلوب وبأقل الخساير وتقليلها

ماحدش يتوقع موقف الزمالك قبل ” فيريرا ” ، محدش يتوقع ان النظام هيقدر يمحي العشوائيه بالسرعه دي ، فيريرا حرفيا كان بيبدأ كل يوم يمسح “التراب” الي كان علي النادي

سواء زملكاوي أو غريم لازم تحترم شخص واقعي قدر يغير قناعاته وافكاره ويشتغل بالعقل والمنطق ويتعامل مع المشاكل بكل بساطه وصبر ويلصم الامور مع فريق مشاكله كبيره جدا ومع ذلك تحدي الواقع والمستحيل وحقق نتائج إيجابية جدا محدش يتوقعها وبالنسبالي بمثابه ” الاعجاز “

“العقلانية والمنطق والثقه”

نقطه كمان جميله حبيت اوضحها “التصريحات” بعد انتهاء المباراة خرج فيريرا وصرح انه “غلط” وقال ” كان بإمكاننا الفوز بنتيجة كبيرة على الأهلي ولكني أخطأت في التغييرات “

قال انه “غلط” عادي أتكلم بكل صراحه ومكانش ينفع يخرج سيف وكان فيه إستعجال متخيل راجل كسبان النهائي وعلي الغريم مقدم مباراه عظيمة يخرج بكل ثقة وهدوء يقولك انا غلطت عكس المدربين اللي عندنا خالص حرفيا كلمه ” بروفيسور” مش من فراغ والله عنده تصالح مع النفس وثقه كبيره.

” كوتش داخل وخارج الملعب “

كمان “فيريرا” مميز في شخصيته علي الخط وازاي اقدر اوجه الاعيبة أتكلم مع الكل لو ركزت هتلاقي في معظم المبارايات دايما فيريرا واقف وبيزعق ويتكلم كتير ويوجه كل لاعب وينادي عليهم وفي كل توقف في المباراة بيتكلم مع كذا لاعب ويفهم الاعيبه ويصحح الغلطات .

غير انه اشتغل مع اللاعبين في الأساسيات كمان ( أ ب ) كورة بشهادة لاعيبة كتير سواء ” ابراهيم صلاح ” في الفترة الأول أو ” زيزو ” في الفترة الثانية ومع ذلك كون منظومة قوية وكان من المدربين المميزين في إستغلال فترة توقف المباراة لمدة دقيقة لشرب المياة .

الصفقة السحرية الوحيدة اللي اتعملت صح في الفترة دي الراجل أبو 76 سنه اللي ناس بتقول عليه شطب وعجز وهو ” فيلسوف” كبير فاهم اللعبه صح

مشاكل تظهر تاني بسبب فشل إداري بحت وقف قيد إصابة الونش أهم مدافع عندك وفي مصر ، رحيل واحد من أكثر اللاعبين المميزين عندك إمام عاشور ، غير تصريحات المجلس ضدك ، عدم تلبيه أبسط متطلباتك الصفقات فيريرا كان عايز مروان عطية بالمناسبة ومع ذلك جه الزمالك لاعيبة أقل بكتير مستواهم صعب !

مين هيحاسب علي المشاريب قدام الناس ؟؟ فيريرا زي ما حصل يوم نهائيا الكأس في أبوظبي ..

طبعا كرة القدم عمرها ما هتديك كل حاجة كاملة لازم فب لحظات حزن كالعادة مجلس الإدارة يفشل في أمور عديدة ويعلق شماعة الفشل علي فيريرا ويرحل ويرجعه تاني ! ونا كنت ضد عودة فيريرا تاني ولكن ما علينا ..

يكفي انه مازال لحد دلوقتي فاكر النادي ورشح المدرب ومتابع أخبار وتفاصيل النادي وحابب الجمهور وبقي بمثابة مشجع للنادي ..

بشكل عام فيريرا هيفضل واحد من اعظم مدربين الزمالك ومن أعظم المدربين اللي جم مصر مع مانويل جوزيه

We Trust broses ,We trust prof , We trust you

عيد ميلاد سعيد يا بروفيسور ، عيد ميلاد شخص إستثنائي حببني في المدرسة البرتغالية

نحن مدينين ليك بالكثير ي رجل

sportnews.it.com