حقيقى مدرب مجتهد

ثالث بطولة لايمن الرمادي المدرب االمجتهد اوى اللى في كل رهان بيثتب نفسه

وان هو مدرب قدير،بيقدر يضع بصمته علي كل فريق بيقوده،ببساطه وانت قاعد بتتفرج تقدر تقول إن ده فريق بيدربه ايمن الرمادي …

في أمور بتميز ايمن الرمادي بشكل مستمر ظهرت تحديدا مع سيراميكا والزمالك هي أن الفريق معاه بيكون أكثر حراكيه وديناميكية

الفريق بيتبادل الأدوار بشكل مستمر خلق مجموعات لعب في كل جزء من الملعب علشان تقدر تسهل علي اللاعبين عملية تبادل التمريرات

حتي تدخلاته أثناء سير المباراة كانت ممتازه جدا الحقيقة ورجحت كافة الفريق

الديناميكية اللى بتكون بين اللاعبين بتخلق مشاكل كبيره للخصوم

لو استغلها الفريق بشكل سليم،خصوصا لما يكون الخصم بيعتمد علي الرقابة الفرديه بشكل أكبر

في مباراة بيراميدز الزمالك ظهر الشوط الأول بشكل أقل في عملية الخروج بالكره وكان بيخسر الكره في أماكن متقدمه ..

حقيقى مدرب مجتهد ويستحق الفرصه ظهر دا فى الشوط الثانى

في الشوط الثاني الرمادي عالج الأمر بشكل جيدا عن طريق الديناميكية بين اللاعبين والتحرك المستمر بدون كره

استغلال ال inverted back أو الظهير الداخلي بالثاني عمر جابر وفتوح بشكل متغير نسبيا، الثنائي كان بيتمركز في انصاف المساحات

في مناطق مرتفعه من الملعب وبيفتح عرض الملعب بثنائي الوينجات طب هو عمل كده لي ؟

اولا هو كده بيعمل خلخلة عند الخصم ال كان محضر كل لاعب هيراقب مين بالتالي

هو دلوقتي مش قادر يحدد هيستمر في مكانه ولا يتحرك مع اللاعب التاني،وفي نفس الوقت بيوفر الوقت للثنائي عبدالله السعيد وناصر ماهر

اللى هما ثنائي وسط مساند أن هما ينزلو للاسف للمشاركة في بناء اللعب وتسهيل الأمور علي الفرق في الخروج بالكره ..

نزول عبدالله وناصر كمان بيكون بغرض هدف معين لان الثنائي كان بينزل للخلف

بس بيتحرك علي الأطراف والغرض من كده هو سحب وينجات بيراميدز لمناطق اعلي للضغط وده كان بيوفر للفريق أن هو يخلق موقف 2 ضد 1 علي الاطراف

ايمن الرمادي بيقدم أمور جيده جدا

مدرب علي علم جيد رحيله من الزمالك متوقع لكن وجوده في فريق آخر باسكواد محترم

ووقت اطول هيقدر يقدم نسخه فريق مناسبة …

رحلة كابتن أيمن الرمادي حقيقي ملهمة وعظيمة.. مدرب عظيم جدا

الراجل دا تمكن من الصعود فى سبع مرات مختلفة لدوري المحترفين فى الإمارات

مع نادي عجمان مثلا صعد الفريق لدوري المحترفين وبعدين فنش سابع فى الدوري

قائد نادي دبي لدوري المحترفين وعمل بيهم أكبر إنجاز ف تاريخهم ربع نهائي الكأس

مع أسوان قدم كرة قدم عظيمة مع أسوان

ومع سيراميكا كسب بطولات وعمل تيم قوي ولعب كورة حلوة وهجومية

كسبان تلت بطولات محلية خر ٣ مواسم مدرب بطولات

كابتن أيمن الرمادي أفضل من ٩٠% من المدربين الأجانب المشطبين اللي بيجم مصر

انا عندي الرمادي أو طارق مصطفى او مؤمن سليمان أفضل من مشطبين أروبا اللي بيجوا الدوري المصري ياكلوا عيش بالمعنى الحرفى

رحلة كفاح الراجل دا عظمة 🤍

انا كنت قربت عموماً افقد الامل في المدربين المحليين ومش لاسباب فنية فقط

لان المدرب عبارة عن ميكس من حاجات كتير جزء منها الفني

كابتن ايمن الرمادي بجانب انه مدرب شاطر ومجتهد وراجل دراسته في الكورة كانت سبب في توسيع أفقه ومداركه الفنية والتيكتيكية ..

الا ان عنده جانب مقدرناش نشوفه غير وقت احتفال الزمالك بالكأس ووقت مؤتمراته الصحفية

انسان جميل ومؤدب وخلوق وبيتعامل بإحترام ضخم مع لاعيبته ومهتم جداً بالجانب الانساني وتفهمه التام لقوة تأثير الجانب ده على اداء اللاعب

وهو بيعانق عمر جابر قاله ( أنا اتشرفت اكون مدربك ! ) سيف جعفر يقول ( الراجل ده أحياني من تاني بعد ما اتنسيت )

الشخصية السوية المدرب اللي بتجعل اللاعبين يحبوها وحابين وجودها وبسبب كده بيقاتلوا في الملعب عشانها

معنديش فكرة كابتن أيمن مكمل ولا لا .. لكن جمهور الزمالك بيحبك يا كابتن وبيشكرك حقيقي انك كنت قد المهمة الفترة الصعبة دي

وحقيقي الكورة كانت منصفة في انها تراضيك وتحطك في الواجهة وتخليك ترفع الكاس

شكراً حقيقي يا كابتن ايمن♥️

الزمالك بطلا لكاس مصر على حساب بيرميدز

نطاق الرياضة