شيكوبانزا لعيب كويس وبيمتلك مقومات مش موجودة

بشوف إن شيكوبانزا لعيب كويس وبيمتلك مقومات مش موجودة

عند أجنحة كتير في الدوري. لعيب سريع جدًا ، مباشر، مراوغ وخداع، وعنده قدرة يطلع المدافع بره الموقف بسهولة جدًا لو المدافع سرح أو تمركز غلط ومقدرش الموقف فوق كل ده أعصابه باردة وده شيء مهم جدًا في الماتشات المقفولة الصعبة.

ممكن كمان توظفه كلاعب حر خلف المهاجم يتحرك في المساحات ويبقي جاهز لمهاجمة أي مساحة تظهر خلف المدافعين أو يخلقها المهاجم.

بمعنى لو فيه لعبة مركبة المدير الفني شغال عليها زي الرجل الثالث 3rd Man زي ما جوميز كان بيعملها مع أحمد حمدي و الهدف خلق لاعب حر شيكوبانزا يبقي هوا ال Free player اللاعب الحر كونه سريع وحركي جدًا.

لكن المشكلة الأساسية بالنسبالي هي القرار الأخير، لأن أوقات كل المجهود اللي بيعمله بيضيع بسبب سوء القرار، سواء التمريرة الأخيرة أو توقيت إنهاء الهجمة. ودي نقطة محتاجة شغل أكتر.

أنا شايف إنه محتاج محلل فيديو يقعد معاه كتير، ومدرب صبور وشاطر يعرف يطوره تدريجيًا ويفهمه.

ولو أشتغل مع مدربين زي فيريرا أو أوسوريو ممكن تشوف نسخة إستثنائية محتاج مدرب شاطر وصبور.

الفترة الأخيرة شايفه فايق وبيقدم مستوى كويس، ودي حاجة تحسبله.

أتمنى النادي يهتم بتطويره أكتر، ويكون فاهم إيه مميزاته الحقيقية وإزاي يوظفها تكتيكيًا عشان يطلع أفضل نسخة منه، وفي نفس الوقت يشتغل على عيوبه بهدوء.

لقطة جول بانزا بالنسبالي مينفعش اعديها كدة بغض النظر عن صحة الهدف من عدمه

الشراسة اللي بانزا بيضغط بيها على حامل الكرة وحدة بانزا لما بييجي بوشه للمرمى وبيكون فيه صراع على الكرة بينه وبين الخصم تخليني أقولك ان احنا قدامنا نسخة لبانزا أكثر شراسة وأكثر فاعلية من نسخة بانزا الحالية يمكن بأكتر من اربع أو خمس أضعاف

يتوظف كمهاجم تاني خلف عدي علشان ياخد الكرة التانية من ورا عدي وعلشان يروح للجون بوشه دايما وعلشان كمان نستغل سرعاته وقدراته البدنية في الصراعات الثنائية والالتحامات في البوكس

حتى وقتها قولت تحديدا اني عاوز بانزا ميشاركش نهاااائي في بناء الهجمة ولا حتى ينزل يقوم بدور التارجت مان ويساعد في تطوير الهجمة مع وسط الملعب

انا عاوزه بس يستقبل الباص في ضهر المدافعين ويروح بوشه للجون ويكمل كمهاجم تاني في البوكس ويعملي كثافة جوه المنطقة

وانا متأكد ان بانزا لو اتوظف بالطريقة دي هنشوف نسخة مرعبة حرفيا لأن شيكو عنده قدرات بدنية وسرعات عالية اوووي اووي

يعني لو فاكرين الحاجات اللي ماليك ايفونا كان بيعملها مع الأهلي وكان مميز فيها وكان مرعب لأي خط دفاع بيقابل الأهلي الحاجات اللي ايفونا كان مميز فيها دي شيكو بانزا بيعملها بسهولة اوي وبكفاءة اكبر من ايفونا + ان شيكو كورته افضل من ايفونا

باختصار بانزا لو اتوظف كمهاجم تاني انت معدل استخلاصك للكرة في التلت الاخير من الملعب هيكون اكبر ومعدل الxG للفريق

هيكون أكبر لأن بدل ما انت بتلعب بمهاجم واحد بيكون عليه رقابة من اتنين مهاجمين انت زودت لاعب بيكمل في البوكس مع المهاجم ده وبيستغل رقابة المدافعين للمهاجم الأساسي وبيستلم في المساحات اللي في ضهره وبيروح بوشه للجون وهو أصلا سريع وقوي بدنيا

sportnews.it.com