مباراة روسيا مش مؤشر ولا معيار فني لأي شيء لمنتخب مصر

مبحبش المباريات الودية اللي بتكون أجواءها احتفالية

لكن رغم كدة معنديش مشكلة في ودية مصر ضد روسيا

المباراة بالنسبة لي مش مؤشر ولا معيار فني لأي شيء لمنتخب مصر

مش لأن المنافس روسيا لكن لأن التبديلات عددها فعلًا كبير جدًا جدًا، وده له هدف عند حسام حسن فقط

روسيا مستبعدة من أي منافسة رسمية، وكل الوديات اللي بيلعبها بتكون ضد منتخبات آسيا وأفريقيا وبعض منتخبات الأمريكتين

لكن قوام روسيا اللي لعب ضد مصر قريب جدًا من القوام اللي كسب إيران وقطر وبوليفيا وتعادل مع مالي من شهور قليلة لكنه يبقى منتخب أوروبي!

روسيا طول عمرها غالبية منتخبها من المحليين، ومش منتخب تصنيف أول في أوروبا، كانت ثاني وقت ما نظمت كأس العالم ٢٠١٨، ودلوقت تتصنف ثالث

عمومًا.. وبما إننا هنلعب ضد البرازيل بعد كام يوم، فمش مطلوب من أي منتخب رايح كأس العالم إنه يلعب ودي ضد منتخبين صف أول

ومبروك على زيكو أول مشاركة وأول هدف

لاعب مجتهد وكان من القلائل في الملعب اللي كان مركز على الكرة مش الاحتفالات

بعد ما المباراة أنتهت كان فيه لقاء مع مصطفى زيكو مع إبراهيم عبدالجواد

واتسأل عن الإنضمام وفرحته بالهدف، لكن أجمل حاجة قالها مصطفى إن كل اللي حصل مكانش مخططله من الأساس، وقال لو هو اللي كاتب السيناريو بنفسه عمره ما كان هيبقى بالدقة والجمال ده ، وتدابير ربنا عظيمة طول ما إنت بتسعي ومسلم أمورك كلها لله

بعد رحلة كبيرة من المعافرة في الكورة يوصل للحظة زي دي، أول ظهور وأول هدف بعد ما نزل حتى لو ماتش ودي، لكنه هدف هيفرق مع اللاعب نفسيًا جدًا وهيبقى دفعة معنوية ضخمة، ومن أسعد ليالي زيكو ومن حقه يفرح.

رحلة زيكو جميلة وملهمة للاعيبة كتير.

تقريبًا موسم ٢٠٢٠ وقبلها كان بيلعب في جمهورية شبين، وبعدها إنتقل لـ حرس الحدود سنة ٢٠٢٢ وقدم فترة ممتازة لفتت الأنظار، ثم انتقل لـ زد وكمل بنفس التدرج والتطور.

كمان أتكلم عن فضل الناس اللي ساعدته، وقدم شكره للمدرب العام في زد لأنه علمه تفاصيل مهمة جدًا زي التحركات داخل منطقة الجزاء والتمركز، وأتكلم عن كابتن مجدي عبدالعاطي مدرب زد وقتها لحد ما قدر يتطور أكتر وإنتقل لـ بيراميدز وأثبت نفسه بكفاءة وظهر بشكل مميز.

زيكو جناح أيسر مهاري، سريع، مراوغ ممتاز جدًا، ويقدر يتحول لمهاجم تاني وهيدر مميز ، وكمان جناح داخلي يتحرك بين الخطوط وينقل الكورة بشكل ممتاز. لاعب يستاهل كل اللي وصله.

ملخص الموضوع إن المعافرة والصبر والسعي نتيجتهم حلوة وعظيمة. قصص كتير جدًا في دوري المحترفين والقسم التاني والتالت، وأسماء تستحق الفرصة والعدل وإن الاختيارات تتم بما يرضي الله من الأندية أو الناس المسؤولة عن التعاقدات ووقتها هنشوف لاعيبة هايلة.

ربنا يوفق مصطفى زيكو وكل لاعب مجتهد بيحاول ويسعى.

الفرحه الكبيره اللي فرحها مصطفي زيكو النهاردة دي مستحقه جدا حقيقي !

الراجل ده جابها من تحت اوي ، زيكو بدأ في قطاع ناشئين جمهوريه شبين و استمر 10 سنين معاهم لحد ما انتقل الي حرس الحدود و ساهم بشكل كبير في صعودهم الي الدوري الممتاز !

زيكو اجتهد لحد ما وصل الي زد في 2023 و لعب موسمين كبار قدر يساهم فيهم ب 24 هدف في الدوري لحد ما انتقل الي بيراميدز السنة دي بالرغم انه وصل 29 سنة !

و بسبب قدرات زيكو البدنيه اللي بتخليه يتحول الي مهاجم تاني و يلتقط العرضيات و ينهي الهجمه ، قدر زيكو يسجل في الدوري و في كاس القارات و في دوري ابطال افريقيا لحد ما تم استدعاؤه الي منتخب مصر لاول مرة في مسيرته !

عشان النهاردة زيكو يحصد تمن اجتهاده و يسجل النهاردة اول هدف في اول مباراة دوليه مع منتخب مصر امام روسيا و هيلعب كاس العالم كمان ، لحظه مستحقه جدا لمصطفي زيكو

اتمني حسام حسن بعد مباراة مصر و روسيا يكون ادرك ان تريزيجيه و زيزو مش اجنحه تقدر تدي حلول بالكرة علي الاطراف !

اتمني حسام حسن يكون ادرك ان هيثم حسن هو الجناح الوحيد اللي يقدر يشد الكرة للامام و عنده تسارع في المساحات و يقدر يصنع فرق في التلت الاخير !

اتمني حسام حسن يكون ادرك ان عمر مرموش مش مهاجم صريح و انه لاعب wide 9 بيتغذي علي المساحات و بيحتاج مهاجم صريح جنبه يصنع له المواقف دي و ان المهاجم الوحيد اللي عنده حاليا هو حمزه عبد الكريم !

و اتمني الجمهور يكون ادرك ان اخر منتخب مصر انه يكون منتخب تحولات لاننا مبنعرفش نبني لعب تحت الضغط و اخرنا نلعب كرات طويله او نوجه اللعب للطرف ، هي دي امكانيات لعيبتك و امكانيات مدربك كمان !

منتخب مصر اه كسب منتخب روسيا النهاردة بس مفيش حاجة حصلت النهاردة تخليك متعشم في معجزه تحصل في كاس العالم !

sportnews.it.com