لويس سكيلي أهم مكاسب أرسنال الفترة الأخيرة

صفقة ببلاش ومن العدم في وسط الملعب ظهرت في وقت إنت محتاج فيه الجودة و التأثير و مساندة الفريق بأي قرار فردي يحسم الجيم.

أهم مكاسب أرسنال الفترة الأخيرة عودة و مشاركة لويس سكيلي رغم إن الولد عنده ١٩ سنة ولكن داخل الملعب بتحس إنك قدام شخصية تانية تمامًا لاعب واثق من نفسه عنده جرأة كبيرة جدًا وده ناتج عن ثقته في كل إجابة بيقدمها جوه الملعب

لأن كرة القدم عبارة عن أسئلة متتالية طول الـ٩٠ دقيقة والشطارة إنك تلاقي إجابات منطقية وصحيحة للمواقف اللي بتتحط فيها مش لازم تكون مثالية لكن علي الأقل تكون مناسبة وذكية وتخدم الفريق.

الأسبوع اللي قبل المباراة ده بالنسبة لأي لاعب فترة مذاكرة وتحضير جيد لكن وقت المباراة من أول دقيقة لحد صافرة النهاية ده الإمتحان الحقيقي ولويس سكيلي بصراحة تلميذ مبدع مش مجرد لاعب مجتهد لأن الإجتهاد ممكن يوصلك لحاجات كتير لكن الإبداع ده شيء رباني

الولد ماشاء الله محسسنيش للحظة إني بتفرج علي لاعب صغير أو لسة بيبدأ بالعكس حسيت براحة وهدوء وثقة كبيرة جدًا لدرجة إني محستش أصلًا بغياب لاعب بحجم زوبيميندي وثنائية زوبيميندي و رايس مهما كانت عظيمة فهي محتاجة راحة وتدوير لأن كمية الضغط البدني والذهني والعصبي عليهم صعبة والمشاركات المستمرة بدون راحة مستحيلة تكمل بنفس الجودة.

أخر ٣ مباريات لسكيلي أكيد خلت أرتيتا يعيد حساباته ويفكر بشكل أوضح في فكرة منحه دقائق أكتر لأنك قدام لاعب كل ما بياخد ثقة ومساحة بيظهرلك أبعاد جديدة في لعبه وده يخليك تفكر فيه مش بس كحل للمباريات الجاية لكن كعنصر أساسي في مشروع الموسم الجديد بالكامل.

أرسنال كان محتاج جدًا للاعب يقدر يقاوم ضغط الخصم ويحمي الكرة تحت الضغط وينقلك اللعب بسهولة ما بين الخطوط بدون ما تدخل في مرحلة فقدان واستقبال تحول دفاعي كان محتاج لاعب

لعيب مباشر وسريع يقدر يخترق العمق ويحرر اللي حواليه ولاعب مجهز قراره قبل ما يستلم أصلًا أول ما الكرة توصله يكون عارف هيعمل اي وإمتي وإزاي ودي من أكتر الحاجات اللي مميزة سكيلي.

سكيلي محظوظ جدًا بالتأسيس اللي أخده في مدرسة أرسنال والأكاديمية والمدربين اللي اشتغل معاهم لكن إحنا كجمهور كمان محظوظين بموهبة وعقلية بالجودة دي.

فرحان جدًا بعودته ومتحمس أشوفه بإستمرار سواء كظهير أيسر

أو inverted fullback ظهير عكسي أو حتي كمحور وسط وده أفضل مكان ليه في وسط الملعب من وجهه نظري.

عمومًا أي دور هيلعبه هتحس بقيمته وتأثيره الحقيقي وجودته

الكبيرة جدًا جدًا.. بحب لويس سكيلي وبحب اللي بيحب لويس

sportnews.it.com