بطولة الدوري هتفضل محفورة بإسمه

وارد جدًا نشوف إسم المدير الفني الجديد للنادي خلال الأسبوع ده، ودي بقت مسألة وقت لكن بعيدًا عن أي حاجة، حابب أتكلم عن موقف يستحق التقدير طوال الفترة الأخيرة الواحد مشافش لقاء، ولا مداخلة هاتفية، ولا حتى تصريح يثير الجدل من كابتن معتمد رغم إن الواحد متأكد 100% أكيد كله كان بيحاول يتواصل معاه بأي شكل عشان يسحب ولو معلومة واحدة.

هدوء تام وإحترام كبير للنادي وللمكان وحابب أشيد بالموقف ده.

كابتن معتمد لحد اللحظة دي ثابت، رغم إنه ميعرفش مصيره بشكل نهائي، ورغم إن بنسبة كبيرة ممكن يرحل. والأهم إنه رفض عروض وصلته علشان يفضل مكمل مع النادي لأخر دقيقة. حاجة تُحسب له بكل تأكيد.

تخيل كل يوم تسمع إسم مدير فني جديد، وكل يوم تلاقي أخبار بتأكد إنك خلاص راحل، وإنت في نفس الوقت عارف إن بنسبة كبيرة دي النهاية ورغم كل ده مكمل عادي، بتحضر وتشتغل وبتقوم بدورك لأخر دقيقة وكأن مفيش أي حاجة.

أي حد مكانه كان ممكن يمشي من بدري ويشوف مستقبله طالما عارف إن مصيره الرحيل، لكن كابتن معتمد فضل مكمل ومحترم النادي لآخر لحظة.

بطولة الدوري هتفضل محفورة بإسمه، وكان قريب جدًا من إضافة لقب قاري لكن قدر الله وما شاء فعل مش مكتوب للنادي غير فرحة واحدة وكانت ببطولة الدوري.

في النهاية طبيعي جدًا في الكورة إن أي مدرب أو لاعب هيبقى ليه ناس مؤيده وناس معارضة، دي طبيعة كرة القدم وماحدش هيختلف علي كده.

لكن سواء كمل أو كانت النهاية هنا، هيفضل كابتن معتمد واحد من أبناء النادي الأوفياء، ومدرب نجح يحقق بطولة دوري في ظروف كانت صعبة جدًا، وقبل أي إنجاز هو شخص محترم، وده يشهد بيه
كل اللي اشتغلوا معاه أو تعامله معاه عن قرب.

كل الإحترام والتقدير لحضرتك يا كابتن معتمد، وربنا يوفقك في أي خطوة جاية، سواء كانت مع النادي أو في أي مكان تاني

sportnews.it.com