نادي بورنموث أعلن رحيل مدربه أندوني إيراولا

بورنموث أعلن رحيل مدربه أندوني إيراولا بنهاية الموسم، ومع الأهتمام الكبير من أكتر من نادي، دي فرصة مناسبة نتكلم بشكل أعمق عن واحد من المدربين اللي ليهم مكانة خاصة عندي من أيام شغله في الدوري الإسباني مع رايو فاييكانو.

أكتر حاجة بتميز مدرسة إيراولا هي الفاعلية الهجومية لعب مباشر سريع، وصول لمرمى الخصم بأقل عدد ممكن من التمريرات، واعتماد كبير على استغلال اللحظة اللي الخصم مبيبقاش فيه منظم.

موقع نطاق الرياضة نزل تحليل كامل عن فترته وأسلوبه وهنحاول نرتب كل حاجة بالتفصيل ونشرح إزاي إيراولا مدرب عبقري و إضافة ضخمة لأي منظومة.

إيراولا مش بس حسن النتائج في بورنموث، لكنه أعاد تشكيل هوية الفريق بالكامل أسلوب قائم على الضغط العالي، السرعة في التحولات، واللعب المباشر ، مع كرة هجومية ممتعة وفعالة في نفس الوقت، ودي معادلة صعبة جدًا مش أي مدرب يقدر يحققها.

الأهم إن الفريق كان بيعتمد على أسماء عادية قبل قدوم إيراولا لكن بعد توليه المهمة معظم الأسماء دي تطورت بشكل كبير، ورغم رحيل أسماء مؤثرة زي دين هويسن للريال و كيركيز لليفر و زابارني لباريسوكيبا لتشيلسي

بالإضافة إلى رحيل الهداف دومينيك سولانكي للنادي اللندني توتنهام

و معاهم العقرب سيمينيو إلى مانشستر سيتي إلا إن الفريق قدر يحافظ على إستقراره وتنافسيته بشكل كبير، وده يوضح إن المنظومة عند إيراولا رقم واحد وأهم من الأفراد.

المدرب الإسباني نجح كمان في كسر الرقم القياسي للنادي من حيث عدد النقاط في موسمين متتاليين منذ توليه المهمة في صيف 2023، ومع إحتمالية تكرار نفس الإنجاز رغم التحديات الكبيرة والتغييرات المستمرة في القوام.

بعد الفوز الكبير على أرسنال المنافس علي لقب الدوري خارج الأرض، وصل الفريق لسلسلة نتائج إيجابية 12 مباراة بدون هزيمة

السلسة الأطول ليه في الدوري خلال الموسم، وبتعكس قوة المشروع وثباته.

أسلوب بورنموث مع إيراولا من أكتر الأساليب المناسبة لطبيعة الدوري الإنجليزي

اللي بيميل للقوة والسرعة والتحولات. وده اللي أشار له بيب جوارديولا لما اتكلم عن تطور كرة القدم الحديثة، وذكر فرق زي بورنموث، برايتون ، ليفربول ، نيوكاسل

الأرقام كمان بتدعم ده وبتوضح كل حاجة موسم 2024/2025 شهد زيادة واضحة في فعالية التحولات السريعة فريق بورنموث كان ضمن أفضل الفرق في تحويل التحولات لتسديدات وأهداف بمتوسط 1.73 تسديدة من التحولات السريعة مقارنة ب 1.79 في مواسم سابقة

بورنموث بيحتل المركز الخامس في الدوري من حيث التسديدات الناتجة عن الهجمات المرتدة برصيد 119 تسديدة وسجل 18 هدف رغم فارق الإمكانيات مع فرق أكبر وبقوام أقوي

بورنموث بقى من أسرع الفرق في التقدم بالكرة، وبأقل عدد تمريرات وده بيعكس فلسفة اللعب المباشر.

كمان فيه معلومة مهمة حابب أتكلم عنها وهي إن الفريق ضمن الأفضل في عملية الضغط العالي، سواء في إستعادة الكرة في مناطق متقدمة أو تحويلها لفرص مباشرة.

لو هنربط الكلام بمعدل الـ PPDA اللي بيأكد إن الفريق من أكتر الفرق ضغطًا على المنافس واستعادة الكرة.

إيراولا بيعتمد بشكل واضح على إستغلال لحظة استعادة الكرة، وأول تمريرة بتبقى للأمام مباشرة، إتجاه المهاجم والسبب لإستغلال حالة الخصم و عدم تنظيم الدفاع. الفكرة كلها قائمة على السرعة وإتخاذ القرار السريع.

ورغم البداية الصعبة جدًا بدون أي فوز في أول 9 مباريات، وقد إيه كان فيه شكوك كتير حول إستمراره إلا إنه قدر يقلب الوضع بالكامل لصالحه وهوا الأعلى من حيث تجميع النقاط لفرق بنفس المستوى غير فرق القمة زي ليفربول ، مانشستر سيتي ، مانشستر يونايتد ، تشيلسي أستون فيلا ، وأرسنال بإجمالي 146 نقطة ومعدل 1.47 نقطة في المباراة.

ورغم إنهاء الموسم في مركز متوسط، إلا إن إحصائية Expected Points أو الأرقام المتوقعة كانت بتشير إنه يستحق مركز أوروبي، وده يوضح إن الأداء كان أفضل من النتائج وكان فيه مبارايات هوا الطرف الأفضل والاحق لكنه مقدرش يحسمها بسبب قرارات فردية
وأخطاء من اللاعبين.

في النهاية، إيراولا قدر يثبت نفسه كواحد من أهم المدربين الصاعدين في أوروبا، ومواكبه الكرة الحديثة وتحقيق نتائج بإمكانيات محدودة، إنتقاله لنادي أكبر بقى مسألة وقت مش أكتر، وطبيعي جدًا إن إيراولا يرتبط بأندية كبيرة زي ليفربول، تشيلسي، مان يونايتد ونيوكاسل.

مدرب عبقري أندوني إيراولا

sportnews.it.com