اللي عملوا نادي نوتنجهام فوريست النهاردة في الدوري الاوروبي ده انجاز عظيم بكل المقاييس !

نوتنجهام فوريست عملوا مفاجأه كبيره النهاردة و فازوا علي بورتو متصدر الدوري البرتغالي بهدف نظيف عشان يتأهلوا رسميا الي نصف نهائي الدوري الاوروبي في حدث محصلش من 42 سنة !

الانجاز ده عظيم فعلا لان نوتنجهام فوريست غير 4 مدربين في الموسم الحالي ، مفيش نادي في العالم عمل كدة ابدا ، من نونو سانتو الي بوستيكوجلو الي شون دايتش الي حاليا الراجل اللي بيضحك قصادك ده و هو فيتور بيريرا ، عدم استقرار غير طبيعي !

مش بس كدة ، انت متخيل ان فيتور بيريرا تمت اقالته من وولفز السنة دي و قضي 3 شهور في البيت و يدوب لسة ماسك نوتنجهام فوريست من شهرين و برغم ذلك طلع فينيرباخشه و ميتيلاند و بورتو من البطولة و شال الفريق الي نصف النهائي بالرغم انهم في الدوري فارقين 3 نقاط فقط عن الهبوط ، سيناريو عجيب !

الجميل بقي هو المشهد العظيم اللي قدامك ده ، لعيبه نوتنجهام فوريست بعد تسجيل الهدف رفعوا تيشيرت ايليوت اندرسون اللي غاب عن مباراة النهاردة بسبب ان والدته فارقت الحياه و كتبوا علي التيشيرت ” العائله اولا ، نحن جميعا معك “

حد لسة فاكر ” اردا توران ” اللي كان بيلعب في برشلونة و اتليتكو مدريد ؟
اهو اردا توران بيعيش النهاردة حلم جميل في كرة القدم لكن كمدرب

اللي حصل بالظبط ان مسيره اردا توران كلاعب انتهت باسوا طريقه ممكنه ، انتقل الي برشلونة في 2015 و ملعبش لمده 6 شهور و بعدها طلع اعاره و اتباع ببلاش الي جالاتسراي و ملعبش معاهم غير موسم و بعدها قرر يعتزل في 2022 !

المبهر بقي ان اردا توران بعدها ب سنة بالظبط اتجه للتدريب و بدأ مع نادي ” ايوب سبور التركي ” و قدر يحقق معاهم دوري الدرجة التانيه في اول موسم و صعدهم للدرجة الاولي لاول مرة في تاريخهم ، و في تاني موسم حقق مركز سادس تحت المراكز المؤهله اوروبيا بفارق نقطه واحده بس !

عشان بعد النجاح المبهر ده نادي شاختار يتعاقد معاه السنة دي و من اول موسم لعب 40 مباراة خسر منهم 3 فقط ، تصدر الدوري الاوكراني ، فاز النهاردة علي الكامار الهولندي بنتيجة 5 / 2 في مجموع المباراتين و صعد بيهم الي نصف نهائي دوري المؤتمر الاوروبي كاول مدرب تركي يوصل للدور ده من 13 سنة !

من لاعب اعتزل في هدوء تام الي مدرب قادم و بقوة ، اردا توران عاد اليكم من جديد

الصورة اللي قدامك دي بتثبت ان مفيش سيناريوهات في الدنيا اجمل من سيناريوهات كرة القدم !

الصورة اللي فوق ده كانت في 2019 و تحديدا يوم تتويج بايرن ميونيخ بالدوري الالماني ال 29 في تاريخه ، في الصورة دي هتشوف ولد صغير بيتفرج علي ريبيري و هو شايل درع الدوري ، عارف مين الطفل ده ؟

الطفل ده يا سيدي هو بافلوفيتش لاعب وسط بايرن ميونيخ حاليا و ساعتها كان عنده 15 سنة و بيلعب في فريق الشباب و في نفس الوقت كان بيشتغل كجامع كرات مع الفريق الاول ، عشان كدة نظرته هنا كانت نظره طموح و حلم ، امتي هبقي زي الناس دي ؟

الشئ المبهر بقي ان بافلوفيتش بدأ مسيرته في نادي منطقته و هو ” فورستنفلدبروك ” و في خلال سنة بالظبط اكتشفه كشافين بايرن ميونيخ في بطولة محليه و ضموه للاكاديمية ببلاش و هو عنده 7 سنين فقط !

عشان تلف الايام و بافلوفيتش النهاردة يكون لاعب الوسط الاساسي في بايرن ميونيخ و يرفع لقب الدوري و يقدم اداء تاريخي امام ريال مدريد و يسجل امامهم هدف غالي جدا في عمر ال 21 في صفقه كلفت بايرن ميونيخ صفر مليون يورو ، المعني الحرفي لكلمه صفقه ذهبيه

انا عارف ان مانويل نوير غلط في الهدف الاول ، بس كل ده ممكن يتغفر قصاد تصدي عفيجي خيالي زي ده !

انا فضلت واقف متنح قصاد التصدي ده ، معرفتش استوعب اللي عملوا نوير هنا لدرجه اني دخلت اشوف المباراة تاني و حملت لقطه التصدي بكل الاعادات بتاعتها و شغلتها سلو موشن و اكتشفت ان التصدي ده اعجازي فعلا !

اصل تسديده مبابي تعتبر قريبه ، كمان قويه و سريعه ، نوير بقي مهموش كل العوامل دي ، الراجل ثبت نفسه و فرد دراعه اليمين و الاعجاز هنا انه مصدهاش ب ريست اليد ، ده و الكرة رايحه للريست فجاه قلب دراعه و طلعها بالساعد ، شئ مش طبيعي فعلا !

الراجل ده وصل 40 سنة و هتلاقيه بيغلط عادي لان التركيز بيقل مع تقدم العمر بس بالرغم من كدة نوير لسة قادر يعمل تصديات اعجازيه زي اللي عملها امام رونالدو في اوائل التلاتينات ، تصدي سينمائي كان سبب قوي في تأهل بايرن ميونيخ في النهايه !

و الجميل ان لما نوير اتسأل قبل المباراة عن افضل حارس مرمي في التاريخ قال شمايكل و كان و كاسياس و بوفون و كورتوا و مختارش نفسه زي ما في لعيبه كتير بتنساق ورا الانا و بتختار نفسها ، الواحد حقيقي محظوظ انه حضر زمن مانويل نوير

انا مش عارف جمهور برشلونة احساسه كان عامل ازاي لما شاف اللقطه دي !

في اخر 20 ثانيه من مباراة بايرن ميونيخ و ريال مدريد و النتيجة 3 / 3 و خلاص بايرن هيتأهل بالنتيجة دي ، هاري كين مرر الكرة الي اوليسيه و شاورله يروح عند خط التماس عشان يقف علي الكرة و يضيع الوقت !

راح اوليسيه معملش اعتبار ل اشاره هاري كين و انطلق الكرة بشخصية جباره و ركنها في البعيده بكل براعه و سجل الهدف الرابع ، هتقولي ايه علاقه جمهور برشلونة بالقصة دي ؟

هقولك ان نفس المشهد ده حصل بالحرف في مباراة برشلونة و انتر من سنة بالظبط ، برشلونة متقدم 3 / 2 و فاضل 3 دقائق و خلاص هيتأهل للنهائي ، بيدري مرر ل يامال و شاورله عند خط التماس عشان يقف علي الكرة و يضيع وقت ، راح يامال سدد لكن الكرة خبطت في العارضه و ردت بهدف التعادل ل انتر !

الواحد خلاص بدأ يقتنع ان السيناريوهات الحزينه و العجيبه في دوري ابطال اوروبا اتعملت مخصوص عشان برشلونة يعيشها لوحده !

sportnews.it.com