17 مساهمه تهديفيه في اول موسم مع الزمالك

فضلوا يقولوا حد يدفع في جناح مغمور 2 مليون يورو !
فضلوا يقولوا ده لاعب بتاع لقطه و جاي يسترزق !
وايضا فضلوا يقولوا ده مبيعرفش يلعب كورة و اخره يقول ڤاموس !
فضلوا يقولوا ده بيمثل علي جمهور الزمالك في احتفالاته !

الراجل ده سابهم يقولوا اللي يقولوه و فضل قافل علي نفسه و بيلعب كورة و بس ، مش هدفه يستعرض ابدا ، ده بيساعد الزمالك في كل شئ و بيعمل كل الادوار اللي ممكن تتخيلها !

بيضغط اقوي من اي ارتكاز ، بينزل في العمق بين الخطوط و بيبقي صانع العاب ، بيلعب جناح ايمن و ايسر و بينتج من الناحيتين ، لاعب غير متوقع ابدا و عنده حلول لا تحصي بالكرة !

النهاردة امام بلوزداد في ملعب صعب امام حشد جماهيري مرعب ، محتاجش غير لحظه واحده بس عشان يخلص المباراة ، شاف عبد الله السعيد و عدي الدباغ مثبتين اخر اتنين مدافعين ، شاف ناصر نزل و سحب المدافع الايمن ، راح اتحرك من الخارج للداخل في المساحه و سجل هدف الفوز و لو عايز تعرف قيمته فالزمالك معرفش يقف علي الكرة و معملش اي هجمه بعد ما اتبدل بين الشوطين !

بالمناسبه اصابه خوان بيزيرا بسيطه جدا وسيكون فى قياده هجوم الزمالك الجمعه ان شاء الله

17 مساهمه تهديفيه في اول موسم مع الزمالك ، خوان بيزيرا مبهر بكل المقاييس

الزمالك خرج بنتيجة غاليه جدا جدا جدا امام بلوزداد في الجزائر !

الزمالك في الشوط الاول قدم شوط جيد ، في اول تلت ساعه المدافعين كانوا متوترين من الاجواء و بيمرروا بشكل طولي و مباشر كإنهم بيخلصوا من الكرة و بيخسروا ثنائيات و تترد عليهم بتحولات سريعه !

لكن بعدها الزمالك تخلص من التوتر و بدأ يتحكم في الرتم بشكل ممتاز لحد ما سجل هدف عالمي ، عبد الله السعيد و عدي الدباغ ثبتوا الظهير الايسر و المدافع الايسر ، ناصر منسي نزل و سحب المدافع الايمن و عمل كعب عالمي ل بيزيرا اللي اتحرك في المساحه و سجل هدف !

في الشوط التاني بقي الزمالك عاني بشكل كبير ، بيزيرا اتصاب و خرج ، معتمد جمال قرر يدافع الشوط كله ، فكانت النتيجة ان بلوزداد عملوا شوط عظيم جدا خصوصا من مزيان اللي هيمن تماما علي عمر جابر و بسببه بلوزداد سجلوا هدف لكنه اتلغي و بسببه برضه صنعوا فرصه محققه لكن المهدي سليمان شالها ، كان ممكن جدا بلوزداد يخرج متعادل !

فوز الزمالك بهدف خارج ملعبه و العوده علي ملعبه دي نتيجه اغلي من الياقوت حرفيا

النتيجة هي الأهم في مباراة تُعد من الأصعب.

الأداء لم يكن على قدر الطموحات، لكن عندما تلعب في ملعب كهذا، وأمام جماهير بهذا الحماس، فمن الطبيعي أن يتأثر الأداء ويتراجع نسبيًا.

الأهم تحقق بخروج الزمالك منتصرا

الآن، ننتظر الحسم النهائي الأسبوع القادم على استاد القاهرة، بإذن الله،

بفوز سريع ومريح يمنح الفريق فرصة للراحة والاستعداد بقوة للمواجهة الحاسمة في سباق الدوري أمام بيراميدز.

أفريقيا يا زمالك

مكسب هيفرق جدا للقلعه البيضاء

الشوط الأول كان مثالي الصراحة مفهوش غلطة وسجلت، وللأسف إصابة بيزيرا أثرت عليك بشكل كبير،

أما الشوط تاني للنسيان حرفيًا، الزمالك خرج بالستر ودعاء المشجعين في كل مكان.

مش هقدر أنتقد أي شخص دلوقتي، لكن أتمنى من كابتن معتمد ما يأخرش التبديلات أكتر من كده، واللاعيبة الأحق اللي قد المسؤولية هي اللي تشارك، ومش حابب أذكر أسماء معينة.

في كل الأحوال إنتصار هايل وتاريخيًا كمان على أندية الجزائر، وأكيد الجهاز الفني هيتفرج على الشوط التاني وهيقيم أمور كتير محتاجة علاج وشغل كبير لان الفريق البطل بيهتم بكل تفصيلة و بيذاكر كتير.

مبروك المكسب لجمهور الزمالك العظيم

تحيه كبيره للجمور الجزائرى الجميل

هو اه شباب رياضي بلوزداد خسر من الزمالك النهاردة ، بس الواحد حقيقي منبهر بجمهور بلوزداد الجميل ده !

مبدأيا الجمهور عمل دخله عظيمه ، كل شئ متناسق ، تحس انك داخل ملعب في تركيا مثلا ، دخله قويه و ممتعه للعين !

تاني حاجة بقي الجمهور ده محترم جدا ، جايين الملعب عشان يشجعوا فريقهم و يستمتعوا باللعبه و بس ، من اول دقيقه لاخر دقيقه عاملين صخب رهيب و كانوا ورا فريقهم ، حتي لما الحكم لغي هدف بلحسيني كانوا هاديين جدا و مصدرش منهم اي مشكله !

تالت حاجة بقي الملعب نفسه ، ارضيه نضيفه جدا تخلي اي فريق عايز يلعب بأي اسلوب هيعرف يلعب بيه مرتاح جدا ، شئ فخم فعلا و معرفش ليه مفيش ترويج كافي للملاعب دي داخل افريقيا !

لما الاهلي لعب مع شبيبه القبائل كانت مباراة كرة قدم جميله و محترمه في كل شئ ، نفس الكلام النهاردة لما الزمالك لعب مع بلوزداد ، شكرا للجزائر اللي بتقدم منتج كروي بديع

sportnews.it.com