ميسي استثنائي حتي و هو عجوز

ميسي النهاردة مسجلش اهداف امام سويسرا لاول مرة في كاس العالم بعد 9 مباريات متتاليه و اكتفي بس بصناعه هدف ، بس بدون مبالغه الارجنتين مكانتش هتوصل الي نصف النهائي بدون الراجل ده

ميسي النهاردة اللي الناس وصفت اداءه بالمتواضع كان اكتر لاعب صنع فرص برصيد 6 فرص ، اكتر لاعب راوغ بشكل صحيح ب 3 مراوغات ، اكتر لاعب تقدم بالكرة للامام لمسافه لا تقل عن 5 متر برصيد 8 مرات و هو الاكتر في المسافه اللي قطعها بالكرة للامام ب 412 متر ، و طبعا صنع الهدف الاول !

سيبك بقي من كل ده ، ميسي في كاس العالم الحالي و هو داخل علي اربعين سنة ساهم ب 10 اهداف من اصل 17 سجلهم منتخب الارجنتين ، هداف المونديال ب 8 اهداف ، اكتر من صنع فرص ب 21 فرصه و اكتر من صنع فرص محققه للتسجيل ب 7 فرص !

و خد اللي جايه دي ، ميسي عنده اكتر اسيستات متوقعه في المونديال ب 3.4 اسيست لكنه واقعيا صنع هدفين بس ، يعني الطبيعي ميسي يصنع من 3 الي 4 اهداف لكن زمايله ضيعوا الفرص اللي صنعها ليهم ، ايوة ده لاعب داخل في اربعين سنة و هو اللي شايل منتخبه الي نصف النهائي مش العكس صدقني مع ان الطبيعي زمايله يشيلوه و هو في السن ده !

عشان كدة لعيبه الارجنتين النهاردة فضلت تردد بعد المباراة ” من اجل المونديال الاخير يا ليو ” و ده لان ميسي بيديهم كل حاجة فعلا ف رد فعلهم تلقائيا انهم عايزينه يعيش افضل لحظه اخيره ممكن يعيشها

استثنائي حتي و هو عجوز !

الواحد حقيقي بيحسد الجمهور الارجنتيني علي كمية اللحظات السعيده اللي عاشوها في كاس العالم الحالي !

يعني الارجنتين النهاردة كانوا متقدمين بهدف علي سويسرا و اداءهم كان باهت جدا لدرجه ان سويسرا قدمت شوط تاني ممتاز و سجلوا هدف التعادل لحد ما ايمبولو اتطرد و سويسرا كملت ب 10 لاعبين !

فالمباراة تروح ل اشواط اضافيه و الارجنتين تهيمن علي المباراة و الفاريز يسجل هدف خيالي حرفيا في الدقيقه 112 و بعدها لاوتارو يسجل التالت عشان تصعد الارجنتين الي نصف النهائي للمرة التانيه علي التوالي !

في مباراة الراس الاخضر سجلوا هدف الفوز في الدقيقه 111 ، و في مباراة مصر سجلوا هدف الفوز في الدقيقه 92 ، و النهاردة امام سويسرا بيسجلوا هدف الفوز في الدقيقه 112 ، لحظات مبهجه يتمني يعيشها اي مشجع كورة حقيقي !

فرنسا و اسبانيا ، الارجنتين و انجلترا ، نحن علي موعد مع نصف نهائي عظيم بمعني الكلمه

sportnews.it.com