اقل مواسم ليفاندوفسكى

يُقال ان دي اقل مواسم روبرت ليفاندوفسكي !

وإنه فعلاً بقا ثقيل الحركة وتقنياً بقا متصلب بسبب السن (36 عام)

رغم كده !

مين هداف برشلونة ؟ هو ليفاندوفسكي

مين هداف اللاليجا ؟ هو ليفاندوفسكي

وكمان مين الأكثر مساهمات في الدوري ؟ هو ليفاندوفسكي

ليفا وصل الـ37 هدف الموسم ده مع برشلونة

وإجماليّ مساهمات 40 مساهمة !

حتى رغم تضييعه للفرص .. الاهداف اللي بيسجلها استثنائية

وبتحتاج مهاجم كبير زيه مش اي لاعب !

ليفاندوفسكي حالياً في فورم ممتاز مؤخراً وده احد اهم الحاجات اللي اكتسبها برشلونة

في الربع الاخير من الموسم لانه ربع الحسم!

انا عارف ان لمسته الاولي مش افضل حاجة

انا عارف ان حركته بقت تقيله بسبب السن

وبرضوا انا عارف انه بوظ هجمات كتير لبرشلونة

انا عارف انه ضيع فرص محققه للتسجيل كتير

بس قصاد ده بيقولك انا هداف الفريق ب 38 هدف

بيقولك كمان انا هداف الليجا ب 25 هدف

بيقولك كمان انا الوحيد في الدوريات الخمس الكبري اللي سجلت 40 هدف

مع برشلونة و المنتخب الموسم الحالي

احلي حاجة في ليفاندوفسكي انه شخص دايما بيحاول

شخص عنده عقليه محترمه و مش قابل اي احباط او استسلام

نتيجة العقليه دي فهو الموسم ده

و هو عنده 36 سنة سجل اهداف مع برشلونة اكتر من الموسمين اللي فاتوا

نتيجة العقلية دي فهو قدر يقدم استمرارية محترمه

في كرة القدم و سجل اكتر من 600 هدف

و اصبح الهداف التاريخي التالت للدوريات الخمس الكبري

و دوري ابطال اوروبا بعد ميسي و رونالدو !

القليل من الانصاف لهداف الليجا ، روبيرت ليفاندوفسكي 👏❤️

من الاخر كدة حاليا بالنسبه للدورى الاسبانى وهانز فليك

مفيش مدرب في الليجا السنة دي يستاهل لقب الدوري غير الراجل البرنس اللي قدامك ده

الراجل ده مسك جيرونا النهاردة و لعب قصادهم جول مشترك

كميه ضغط عكسي و احباط تحولات و استرجاع للكرة حقيقي مثاليه و مرعبه !

مش بس كدة ، ده كسبهم 4 / 1 مع الرافه

و البدلاء اللي نزلهم زي دي يونج و توريس ساهموا باهداف كمان

مخ نضيف قادر يدي حلول طول الوقت !

مدرب مخلي فريقه متصدر الدوري بدون دكة بدلاء

مدرب مخلي فريقه مقدم امتع كورة في الدوري

وايه تانى مدرب مخلي فريقه اقوي هجوم في الدوري

مدرب شغال يرزع فرق الدوري كلها سكورات

مدرب مخلي فريقه اقوي منظومه ضغط في الدوري

وكمان مدرب مخلي فريقه هو الوحيد في اوروبا اللي مخسرش في 2025

و عامل سلسله لا هزيمه وصلت الي 20 مباراة !

فرق الليجا صعب تصمد امام الجنان ده

.. الشراسة والحدة اللي بنشوفهم في الضغط او في حيازة الكرة واللعب المباشر بإيقاع سريع

مفيش فريق هيقابل برشلونة هيبقى عنده قابلية لإلتقاط الانفاس بالمنظر ده

.. والمشكلة ان الموضوع ابعاده مبقتش تيكتيكية بس

ده برشلونة بقا نازل الماتشات متفوق نفسياً وذهنياً على منافسيه

.. ومش بس لان تم اعداد لاعبي برشلونة بشكل ممتاز في غرفة الملابس

بل لان منافسيهم بالفعل خايفين منهم وشغلهم الشاغل

هو مش ازاي نسجل او نتعادل او حتى نوقف برشلونة .. بل ازاي هنصمد !

الشخصية اللي صنعها هانز فليك في برشلونة تخليك منبهر !

هانز فليك يستاهل لقب الليجا مع برشلونة عن جدارة و استحقاق 👏❤️