حارس مرمى منتخب الجزائر ابن الأسطورة زيدان

المشهد الجميل اللي قدامك ده حصل النهاردة في مباراة الجزائر و السودان في امم افريقيا !

حارس المرمي اللي قدامك ده هو ” لوكا زيدان ” ابن الاسطورة زين الدين زيدان ، ايه بقي حكايه لوكا و ايه علاقته بالجزائر ، تعالي احكيلك

لوكا كان بيلعب مع منتخب فرنسا في الفئات السنيه لكن في شهر سبتمبر الماضي اختار يلعب لمنتخب الجزائر لان علاقته قويه جدا ب جده ” اسماعيل زيدان ، لوكا وقتها قال انه لما بيسمع اسم الجزائر بيعتز جدا بالثقافه الجزائريه داخل العائله و انه اختار الجزائر لاجل سعاده جده !

الجميل بقي ان لوكا النهاردة لعب اول مباراة في مسيرته مع منتخب الجزائر في امم افريقيا و قدم اداء مبهر لانه تصدي ل انفرادين امام السودان و انقذ الجزائر في الشوط الاول و خرج في النهايه بشباك نظيفه !

الاجمل بقي ان زين الدين زيدان كان حاضر المباراة النهارده و شاهد ابنه لوكا ب ابتسامه عريضه و هو بيمثل وطنه الام الجزائر في اكبر محفل افريقي علي الاطلاق ، مشهد تاريخي و في منتهي الجمال حقيقي

بعد مباراة سريعه و قويه بدنيا و مليانه تنافسيه ، منتخب الكاميرون بيفوز النهارده علي منتخب الجابون بهدف نظيف و كسبوا اول 3 نقاط بصعوبه !

و بكدة تكون انتهت الجوله الاولي من امم افريقيا ، جوله فازت فيها كل المنتخبات الكبيره ، المغرب و مصر و تونس و الجزائر و السنغال و نيجيريا و كوت ديفوار و الكاميرون كلهم كسبوا ، حتي جنوب افريقيا و الكونغو و بوركينا برضه كسبوا ، المنطق فاز بامتياز !

جوله شوفنا فيها حضور عربي قوي جدا ، ايوب الكعبي بيسجل هدف اسطوري للمغرب ، تونس بتفوز اخيرا في اول مباراة بعد غياب 5 نسخ متتاليه ، الجزائر بتفوز في اول مباراه بالتلاته بعد غياب اخر نسختين ، مصر بتعمل ريمونتادا و بتكسب و بتسدد 35 تسديده كاكبر عدد تسديدات في تاريخ البطولة !

امم افريقيا هتبدا فعليا من الجولة القادمه اللي هنشوف فيها مواجهات قويه و مفتريه من الاخر ، مصر و جنوب افريقيا ، المغرب و مالي ، السنغال و الكونغو ، تونس و نيجيريا ، الجزائر و بوركينا ، كوت ديفوار و الكاميرون ، نحن علي موعد مع المتعه يا ساده

منتخب كوت ديفوار حامل اللقب بدأ مشواره النهارده في امم افريقيا بالفوز علي موزمبيق بهدف نظيف !

الجميل بقي ان اللي سجل هدف الفوز ل كوت ديفوار هو ” اماد ديالو ” نجم مانشيستر يونايتد اللي بيعيش النهاردة لحظه استثنائيه جدا في حياته !

اماد في الاصل اتولد في منطقه معدمه تماما في كوت ديفوار و بدا يلعب كورة في نادي هاوي اسمه بوكا باركو لكن اول ازمه مر بيها اماد في حياته انه عاش طفولته كلها بدون والدته اللي فارقت الحياه !

تخيل بقي ان بدايه اماد في الاحتراف كانت عن طريق وكيل اعمال ايفواري تظاهر انه والده عشان اماد يسافر معاه ايطاليا و يتسوق للانديه و قدر فعلا يجذب كشافين نادي اتلانتا و استمر معاهم 4 شهور فقط و بعدها انتقل الي مانشيستر يونايتد في 2021 و بعدها ب شهرين بالظبط تلقي اول استدعاء لتمثيل منتخب كوت ديفوار !

اماد غاب عن المشاركه في امم افريقيا الماضية اللي كسبتها كوت ديفوار بسبب اصابه في الركبه عشان يرجع النهاردة و يسجل اول هدف في مسيرته في اول مشاركه له في امم افريقيا و يجيب اول 3 نقاط لبلده كوت ديفوار ، انت لا تعلم ما الذي يحضره لك الله

بدون اي مبالغات ، ابراهيم مازا اول ما نزل النهاردة في مباراة الجزائر و السودان غير المباراة 180 درجه حرفيا !

تخيل منتخب السودان ب 10 لاعبين كان مستحوذ علي الكرة امام منتخب الجزائر في الشوط التاني لحد الدقيقه 60 ، الجزائر مكنش عارف يتحكم في الرتم و كان تايه تماما !

المبهر بقي ان ابراهيم مازا نزل في الدقيقه 60 و غير السيناريو تماما ، نزل هيمن علي المباراة كلها و الجزائر في وجوده سجلت هدفين كمان و لك ان تتخيل ان مازا هو اكتر لاعب صنع فرص النهاردة بفرصتين بالرغم انه لعب 30 دقيقه فقط !

مش بس كدة ، ده كمان ساب بصمته و سجل الهدف التالت بقدمه الضعيفه ، بيتكوفيتش فعلا معاه كنز مينفعش يقعد علي الدكه ابدا !

الكره الأفريقية رفض تمثيل المانيا من اجل الجزائر و النهاردة بيسجل اول هدف في اول مباراة بيلعبها في مسيرته في امم افريقيا و اصبح اصغر لاعب يسجل هدف لمنتخب الجزائر في تاريخ امم افريقيا ، لحظه تاريخيه للجوهره ابراهيم مازا

يا بخت منتخب الجزائر حقيقي بكم اللاعبين الفخمه دي !

منتخب الجزائر قدم عرض ممتع النهاردة و فاز علي منتخب السودان بثلاثية نظيفه في امم افريقيا في سيناريو كان سعيد جدا للجزائر و تعيس جدا للسودان اللي كمل المباراة ب 10 لاعبين للاسف !

الجميل بقي ان رياض محرز سجل هدفين النهاردة و اصبح هداف البطوله في عمر ال 34 ، الراجل ده مهما كبر هيفضل فنان عظيم في استلامه للكرة ، ده غير التحركات الافقيه اللي بيعملها عشان يستلم من زميله و يغير اتجاه اللعب عكس اتجاه المدافعين ، ممتع بشكل مش طبيعي !

انا عايزك تتخيل معايا حجم الرفاهيه اللي عند منتخب الجزائر ، تخيل ان محرز هو الجناح الاساسي و البدلاء هما انيس حاج موسي و الان قبال ، و تخيل ان محمد عموره اساسي و بديله هو عادل بولبينه ، ده غير ابراهيم مازا اللي نزل سجل الهدف التالت ، جوده هجوميه مرعبه حرفيا !

كل الناس مركزه مع المغرب و السنغال و محدش مركز مع منتخب الجزائر خالص اللي لو مدربه بيتكوفيتش استغل كل اللاعبين صح هيبقي واحد من اقوي المرشحين للفوز ب امم افريقيا

السيناريو اللي حصل النهاردة في مباراة بوركينا فاسو و غينيا الاستوائيه في امم افريقيا ده سيناريو مجنووون حرفيا !

تخيل معايا بوركينا مهيمنه تماما علي المباراة و ضيعت كميه فرص مش طبيعيه ، مش بس كدة ده كمان غينيا اتطرد منهم لاعب في الدقيقه 50 و كملوا 40 دقيقه متواصله ب 10 لاعبين ، كل الظروف بتقول ان بوركينا هتكسب خلاص !

تخيل بقي ان بوركينا سجلت الهدف الاول في الدقيقه 73 و ده كان السيناريو الطبيعي راح الڤار لغي الهدف بسبب التسلل ، كل ده كوم و اللي حصل اخر ربع ساعه كوم تاني خالص !

تخيل بقي ان غينيا الاستوائيه و هما ناقصين لاعب سجلوا هدف التقدم في الدقيقه 85 من ركلة ركنيه لكن المفاجاة الاكبر انهم ملحقوش يفرحوا لان بوركينا عملوا ريمونتادا اسطوريه و سجلوا التعادل في الدقيقه 95 و سجلوا الهدف التاني في الدقيقه 98 و كسبوا المباراة ، سيناريو خيالي ! مرحبا بكم في مغامرات امم افريقيا ، مرحبا بكم في متعه الماما افريكا

الصورة اللي قدامك دي هي اقوي اثبات علي براعه المغرب في تنظيم امم افريقيا !

الصورة دي كانت من مباراة تونس و اوغندا امبارح في الملعب الاوليمبي بالرباط ، كميه مطر لا حصر لها نزلت في الشوط الاول تخلي اي مباراة في الدنيا تقف !

لكن العظيم فعلا ان مفيش ولا مباراة وقفت او اتأجلت في امم افريقيا برغم المطر المهول ده ولا حتي اتكونت برك مياه في الملاعب ، كإن مفيش مطر نزل اصلا ، طب ايه السبب ؟

السبب يا صديقي ان المغرب عامله نظام في الملاعب اسمه Subair و النظام ده جاهز يقاوم كل الظروف الطبيعيه من امطار و رطوبه و حراره و جفاف لانه مكون من 6 طبقات

عشب هجين – طبقه نمو – طبقه رمليه – انظمه تصريف – طبقه دعم – اغشيه عازله ، كل الطبقات دي مسئوله عن سحب المياه في ثواني معدوده و تجديد الاوكسجين للعشب و كمان منع انسداد نظام التصريف و منع اختلاط الطين بالجذور ، تكنولوجيا يا محترمين !

المغرب من الاخر بتقدم للقاره الافريقيه تجربه اوروبيه خالصه ، ملاعب علي اعلي مستوي ، مفيش ليزر ، مفيش فوفوزيلا ، كإنك بتتفرج علي امم افريقيا علي اراضي اوروبيه ، شكرا فعلا لاحترافيه المغرب

sportnews.it.com