مشروع مهاجم قوي للمنتخب المغربي

أكاديمية محمد السادس منجم مواهب حقيقي للكرة المغربية وقاعدة ضخمة لإنتاج أفضل وأنقي المواهب اللي بتطلع جاهزة سواء للأندية أو المنتخب، ودي حاجة تحسب للمشروع العظيم اللي فارق بشكل كبير في تطور الكرة المغربية.

شطارة نادي الرجاء إنه قدر يحصل علي موهبة زي سفيان بنجديدة من الأكاديمية ويضمه بدري جدًا ويشتغل عليه في كل الفئات العمرية، ورغم إنه مكملش رحلته معاهم للنهاية لكن هيفضل الرجاء معروف إنه من أفضل الأندية المغربية في تكوين اللاعبين وإخراج مواهب بجودة كبيرة جدًا.

سفيان بنجديدة مهاجم المغرب الفاسي صاحب الـ24 سنة هوا هداف الدوري المغربي حاليًا بـ16 هدف، موسم إستثنائي بكل ما تحمله الكلمة من معنى.

بنجديدة بدايته كانت هايلة وده ساعده إنه ياخد خطوة الإحتراف لأوروبا كعادة اللاعبين المغاربة معظمهم بيخرج لأوروبا وسفيان خرج للدوري البلجيكي مع ستاندارد لييج.

لكن التجربة مكانتش موفقة بالشكل المتوقع، وده شيء وارد بيحصل مع لاعيبة كتير، وشطارتك في إتخاذ القرار المناسب ليك في اللحظة دي بالتحديد يا تختار مكان مناسب تظهر وتبدع مرة تانية يا هتفضل ثابت مكانك تايهه

رجع تاني للدوري المغربي عن طريق المغرب الفاسي ومن وقتها وهو مقدم فترة ذهبية و الموسم الحالي من أفضل مواسمه الصراحة تأثير وشخصية وحضور قوي في المباريات.

سفيان مش بس هداف الفريق، ده واحد من أهم أسباب إن المغرب الفاسي يفضل منافس لحد دلوقتي

ويضغط بقوة في سباق الدوري، خصوصًا إن الفارق بينهم وبين الرجاء نقطة واحدة فقط والأجواء قوية جدًا.

ممكن ناس تبص لسفيان كمهاجم قصير نسبيًا بطول 178 سم، لكن الحقيقة إنه بيعوض ده بذكاء وتحركات وتايمنج ممتاز جدًا، والدليل إنه سجل أكتر من هدف بالرأس وسط مدافعين أطول منه.

كمان عنده تنوع كبير جدًا في طرق التسجيل سواء بالقدم باليمين أو الشمال، كمان لمسته الأولى ممتازة وتحركاته وتمركزاته داخل المنطقة ممتعة لأي حد بيحب يتفرج على مهاجم بيلعب بذكاء عالي.

مهاجم متكامل زي ما قال الكتاب ولسه عنده 24 سنة يعني قدامه سنين كتير يطور نفسه أكتر ويثبت نفسه على مستوى أعلى..

إضافة قوية جدًا لأي فريق

مشروع مهاجم قوي للمنتخب المغربي الفترة الجاية.

ظهير أيسر يستحق المتابعة والإشادة “زكريا لبيب”

ظهير أيسر نادي الشباب السالمي، 22 عام، وشارك مع المنتخب المغربي تحت 17 و20 و23 عام، يعني مر بكل المراحل العمرية وده دليل على ثقة كبيرة في قدراته.

إبن نادي الرجاء ومعار حاليًا لنادي السالمي، لاعب مميز جدًا الصراحة وعنده إمكانيات هجومية ودفاعية كويسة وبيقدم أداء ثابت ومميز في المباريات.

ظهير سريع وإنطلاقته جيدة وتمركزاته هايلة والأهم التايمنج بتاعه بمعني إنه بيعرف يختار توقيت المناسب للتقدم كمان عنده شخصية في الملعب وجرأة في اللعب وبيتعامل بثقة تحت الضغط ودي أهم ما في الموضوع.

يستحق المتابعة ولعيب ليه مستقبل كبير في الكرة المغربية

sportnews.it.com