رونالدو سجل الهدف 986 خلال مسيرته الكروية

في وسط ما كنا منشغلين النهاردة بمباريات الدوريات الاوروبيه ، كان كريستيانو رونالدو بيقرب خطوه كمان من الفوز بالدوري السعودي !

النصر النهاردة فاز بسهوله تامه علي الاخدود بنتيجة 2 / 0 عشان يتصدر الدوري بفارق 5 نقاط عن الهلال و خلاص فاضل 6 مباريات فقط علي نهايه الدوري !

الجميل ان كريستيانو رونالدو سجل هدف النهارده و ده الهدف رقم 968 في مسيرته ، الهدف مكنش من ركله جزاء ولا هدف مقشر ، ده الراجل نزل يربط من زمايله من التلت الاوسط و بعدها اتحرك و طلب الكرة تاني و استلم و دخل خلص الهجمه بكل شياكه !

الاجمل بقي ان النصر عنده رفاهيه بعد الفوز ده ، لانه لو فرضنا مثلا خسر من الهلال او الاهلي هيظل متصدر علي الاقل ، لكن اللي هيفيد النصر انه هيلعب علي ملعبه في المباراتين دول !

رونالدو حاليا مش بيتمني غير 3 حاجات فقط ، الاولي انه يسجل 32 هدف كمان عشان يصل الي 1000 هدف في مسيرته ، التانيه انه يكسب الدوري السعودي الاول في مسيرته

التالته و هي الاهم انه يفوز بكاس العالم ، 3 اشياء لو حصلوا هتبقي نهايه عظيمه بالمعني الحرفي

اللي عملوا فينسنت كومباني النهاردة مع بايرن ميونيخ ده انجاز تاريخي بكل المقاييس !

بايرن ميونيخ فاز النهاردة علي سان باولي بخماسيه نظيفه عشان يتصدر الدوري الالماني بفارق 12 نقطه عن دورتموند و لو فاز المباراة الجايه هيحسم الفوز بالدوري قبل 4 جولات من النهايه ، بس مش ده الانجاز التاريخي !

الانجاز التاريخي هو ان بايرن ميونيخ النهارده وصل للهدف رقم 105 في الدوري الالماني و بكدة يكون كسر الرقم القياسي لعدد الاهداف المسجله في موسم واحد في الدوري الالماني اللي كان 101 هدف في سنة 1972 بعد صمود 54 سنة بحالهم ، كومباني دخل التاريخ حرفيا

الجميل بقي ان كومباني بعد المباراة اتسأل عن سبب تحقيقه للانجاز ده ، راح كومباني قالهم اننا بنبذل كامل طاقتنا و مجهودنا عشان نكون عائلة واحدة ، لسنا دائما علي ما يرام ، لكننا نظل فريق متكامل لاننا ندعم بعضنا البعض !

كومباني شقلب حال بايرن ميونيخ 180 درجه ، جمع شمل الفريق و كون عائلة ، كسب اتنين دوري ورا بعض بكل سهوله ، حقق انجاز تاريخي معلموش هاينكس و جوارديولا و انشيلوتي و ناجلسمان و توخيل ، استاذ و رئيس قسم بكل معني الكلمة

بدون اي مبالغات ، الولد اللي قدامك ده هو اكبر معجزه في كرة القدم حاليا !

اللي بيعملوا لامين يامال كل اسبوع ده خيال بمعني الكلمه مش مجرد بيلعب كورة ،هو بيقدملك عرض مسرحي متكامل الاركان بينضف عينك و بيجبرك انك تصفق و تقول ايه الجمال ده !

يامال النهاردة خلي لعيبه اسبانيول تتعقد حرفيا ، صنع الهدف الاول ، صنع الهدف التاني اللي قدامك ده بافخم وجه قدم خارجي ممكن تشوفوا ، سجل الهدف التالت ، 8 مراوغات صحيحه منهم مراوغات كباري تكيف الدماغ ، كسب 10 ثنائيات ، صنع 3 فرص ، دحيح و بيعمل كل حاجة ، كل حاجة فعلا !

الشئ المرعب بقي ان يامال و هو 18 سنة مستحوذ علي كل احصائيات الليجا ، يعني يامال ساهم ب 26 هدف تحت مبابي بهدف و طبعا مبابي سجل 6 ركلات جزاء زياده عن يامال ، كمان يامال هو اكتر لاعب صنع اهداف و فرص و فرق محققه و اكتر لاعب عمل مراوغات صحيحه ، ده غير انه ساهم ب 42 هدف في كل البطولات ، شموليه فذه !

من الاخر كدة ، مفيش حد بيلعب كورة دلوقتي افضل و امتع من لامين يامال ، نوعيه لامين يامال دي هي اللي تستاهل تشيل البالون دور

جمهور برشلونة يقوم يجهز حاله يلا عشان يحتفل بالدوري التاني علي التوالي !

برشلونة النهاردة اكتسح اسبانيول برباعيه مقابل هدف و رسميا وسع الفارق مع ريال مدريد الي 9 نقاط و خلاص متبقي 7 مباريات فقط ، فازوا بالدوري اكلينيكيا !

قولا واحدا ، مفيش غير برشلونة اللي يستاهل الفوز بالدوري ده ، اه برشلونة عنده مشاكل دفاعيه كتير لكن في نفس الوقت برشلونة بيحترم الكورة و عنده نظام واضح و مفيش لاعب بيلعب لنفسه و الكل بيسجل و بيضغط ، من الاخر مفيش نجم ممشي الفريق علي مزاجه !

مش بس كدة ، برشلونة كمان هو اقوي هجوم في الليجا ب 84 هدف و اكتر فريق صنع فرص محققه للتسجيل ب 144 فرصه ، اشجع فريق ممكن تشوفوا في الليجا !فكرة ان هانز فليك هيكسب اتنين دوري علي التوالي و 5 بطولات في موسمين و هو مصروف عليه يدوب 88 مليون يورو في الموسمين كلهم ده شئ مبهر بمعني الكلمه

اللي عملوا محمد صلاح النهاردة في مباراة ليفربول و فولهام ده شئ عظيم بالمعني الحرفي !

ليفربول فاز النهاردة علي فولهام بنتيجة 2 / 0 منهم هدف سجله محمد صلاح بعد ما اتهمش من ارني سلوت في مباراة باريس و ملعبش ولا دقيقه !

انا عايزك تتخيل معايا بقي ان محمد صلاح وصل النهاردة الي 20 مساهمه تهديفيه في الموسم و ده الموسم التاسع علي التوالي اللي صلاح يساهم فيه ب 20 هدف فيما اكتر مع ليفربول ، انت متخيل الاعجاز !

مش بس كدة ، تخيل ان مفيش غير 5 لاعبين فقط في تاريخ الدوري الانجليزي اللي ساهموا ب 250 هدف ” اهداف بدون ركلات جزاء + اسيستات ” و هم روني – جيجز – الان شيرار – اندي كول ، و الخامس هو محمد صلاح اليوم ، انجاز عريق بكل معني الكلمة !

بدون مبالغات ، اللي عملوا محمد صلاح خلال 9 سنين متتاليه في الدوري الانجليزي ده شئ اسطوري و تاريخي و مش هيتشاف مرة تاني ، للتاريخ يا فخر كرة القدم المصرية الرياضه العالميه

sportnews.it.com