اول لاعب سعودي يفوز بدوري من الدوريات الخمس الكبري

في معجزه بتحصل السنة دي في الدوري الفرنسي محدش واخد باله منها خالص !

نادي لانس فاز النهاردة علي تولوز بثلاثيه نظيفة عشان يتصدر الدوري الفرنسي برصيد 40 نقطه بعد مرور 17 جوله ، بنتكلم في دور اول كامل !

المبهر بقي ان نادي لانس هو اكتر فريق عنده اهداف متوقعه ب 32 هدف و اكتر فريق صنع فرص محققه ب 68 فرصه و اقل فريق استقبل اهداف في الدوري ب 13 هدف بالرغم انه كان المفروض يستقبل 23 هدف ، عندهم حارس مرمي منع 7 اهداف كان المفروض يستقبلهم لانس ، حارس بارع من الاخر !

الجميل بقي ان اللاعب السعودي ” سعود عبد الحميد ” بيلعب مع نادي لانس السنة دي و لو حصلت المعجزه و فاز لانس بالدوري لاول مرة من 28 سنة هيبقي اول لاعب سعودي يفوز بدوري من الدوريات الخمس الكبري في اوروبا ، هتبقي لحظه للتاريخ

انا مبقتش فاهم العلاقه بين كريستيانو رونالدو مع الدوري السعودي و مع الدوريات عموما في الفتره الاخيره !

تخيل النصر السعودي لحد يوم التلات اللي فات كان عامل اقوي انطلاقه في الدوري السعودي ، 10 مباريات ب 10 فوز ، صداره الدوري ، اقوي هجوم ، اقوي دفاع ، رونالدو و فيليكس هدافين الدوري ، علامه كامله في كل شئ !

فجأه النصر اتعادل مع الاتفاق و فجأه النصر خسر النهاردة من الاهلي و لو الهلال كسب بكرة هيبقي متصدر الدوري فجأه و النصر هينزل مركز تاني بعد كل الهيصه دي !

لو حصل و النصر مكسبش الدوري السنة دي هتبقي رابع سنة علي التوالي رونالدو ميكسبش فيها الدوري السعودي و هيبقي اخر دوري فاز به من 6 سنين في 2020 مع يوفينتوس ، شئ في منتهي العجب !

اللي متفرجش علي مباراة الاهلي و النصر في الدوري السعودي النهارده فاته كميه متعه غير عاديه حرفيا !

الاهلي و النصر دخلوا خناقه من الاخر ، الاهلي تقدم بهدفين في اول 20 دقيقه ، راح النصر في ظرف 24 دقيقه رجع و سجل هدفين

راح الاهلي سجل التالت في الشوط التاني و كسب المباراة عشان يبقي اول فوز للاهلي علي النصر في الدوري بعد غياب 6 سنين !

المباراة كانت ممتعه الي اقصي درجه لان تدخل المدربين في الدوري السعودي بيبقي محدود جدا

بالتالي ارتجال اللاعبين هو اللي ظاهر اكتر و ده اللي بيخلي المباريات مفتوحه و مليانه مساحات و تحولات بالجمله !

مباراة شوفنا فيها 5 اهداف و 9 فرص محققه و 37 تسديده و كورتين في العارضه و اتنين كارت احمر و ملعب مبهر و حضور جماهيري ضخم ، مباريات القمه في الدوري السعودي هي واحده من امتع الاشياء الموجوده حاليا في كرة القدم

صحيفه موندو ديبورتيفو الاسبانيه نزلت من 3 ايام بالظبط تقرير يخص محمد صلاح حقيقي في غايه الجمال !

التقرير بيقول ان محمد صلاح بيساهم ب 6% من ثروته في الاعمال الخيريه و وضحوا بالتفاصيل ايه الامور اللي ساهم فيها صلاح ماديا

= ساهم في بناء مستشفى و مدرسه و مركز شباب و محطه لمعالجه المياه في قريه نجريج !
= ساهم بمبلغ ضخم للمعهد القومي للاو رام !
= ساهم في تمويل منح دراسيه للطلاب محدودي الدخل في جامعه كامبريدج !
= مساعدات شهريه للاسر المحتاجه !

محمد صلاح ممكن يكون معندوش علم يفيد به الناس زي الدكتور و المهندس و المدرس و المحاسب و كل المهن ، لكن ربنا كرم صلاح بالمال و مساهماته الماديه كانت سبب في تعليم طلبه كتير في مدارس و جامعات و سبب في علاج ناس كتير في مستشفيات و سبب في ستر ناس كتير مش قادره علي ظروف الحياه الصعبه !

التأثير ملوش حدود ، ان مكنش بالمهنه فهيكون بالحرفه و ان مكنش بالحرفه هيكون بالمال و ان مكنش بالمال ممكن حتي يكون نفسيا بابسط الاشياء ، ب لسانك اللي بينطق كلمات تشجيع دايما و ب قلبك اللي حاسس بالناس طول الوقت ، حتي لو شوفت راجل كبير مش عارف يعدي الشارع بس انت قررت تمد له ايدك و تعديه ، ايوة متستصغرش التأثير ده لان مش كله قادر يحس بالناس زيك !

فى حقيقي شكرا لمحمد صلاح علي التأثير الكبير ده و شكرا لكل واحد قادر يستغل كرم ربنا عليه و يفيد به الناس

انا مش عارف في كام واحد واخد باله من التفصيله دي بس الحضور العربي في امم افريقيا الحاليه شئ عظيم حقيقي !

مبدأيا احنا عندنا 5 منتخبات عربيه من اصل 6 اتأهلوا الي ثمن النهائي منهم 3 منتخبات تصدروا المجموعة ، المغرب و مصر و الجزائر و تونس و السودان !

لو جيت بصيت علي اقوي هجوم في البطولة هتلاقيه نيجيريا ب 8 اهداف ، لكن تاني و تالت اقوي هجوم عندنا 4 منتخبات منهم 3 منتخبات عربيه ، الجزائر و المغرب و تونس ، اما بقي لو جيت بصيت علي اقوي دفاع في البطولة هتلاقي 5 منتخبات منهم 3 منتخبات عربيه ، المغرب و مصر و الجزائر !

المبهر بقي هو عدد اللاعبين العرب المتصدرين لاهم الاحصائيات في البطولة ، اتفرج علي الجمال

= هداف البطولة : ايوب الكعبي – رياض محرز – براهيم دياز
= اكتر لاعب صنع اهداف : اوناحي – انيس حاج موسي – حنبعل المجبري
= اكتر لاعب صنع فرص : ابراهيم مازا ، تحته اوناحي و محمد صلاح
= اكتر لاعب عنده اسيستات متوقعه : اوناحي
= عندنا 5 لاعبين عرب في التشكيل الافضل لدور المجموعات : محمد الشناوي – مزراوي – علي العابدي – براهيم دياز – رياض محرز

تألق و تصدر للمشهد غير عادي ، المنتخبات العربيه بكافه لاعبيها عاملين بطوله اقل ما يقال عنها انها فخمه و تشرف فعلا

عارف احساس الفرحه بعد المعاناه ؟
هو ده الاحساس اللي عاشوا امبارح مدافع منتخب الجزائر ” زين الدين بلعيد “

زين من سنة كان قريب جدا للاهلي المصري لكن وقتها جالوا عرض احتراف في اوروبا في نادي سانت ترويدن البلجيكي و فعلا مضي العقد معاهم و اصبح لاعب في صفوفهم !

لكن للاسف زين حصلت له مشكله كبيره و تم استبعاده من الفريق في نصف الموسم و كمان عرضوه للبيع لانه عاني من ازمه نفسيه لان والده فارق الحياه في شهر فبراير و ده اللي خلاه يفقد طاقته و شغفه عشان الموسم ده يرجع الجزائر تاني و يلعب في صفوف شبيبه القبائل !

الشئ المبهج بقي ان زين بدا اساسي امبارح مع منتخب
الجزائر امام غينيا الاستوائيه في امم افريقيا و سجل اول هدف دولي لي مع الجزائر عشان يكتب علي حسابه بعد المباراة الجمله دي

” شعرت بك يا والدي في هذه اللحظه ، اهديك هذا الهدف انت و عائلتي و المدربين الذين وثقوا بي و جميع الشعب الجزائري ”

واحده من اكتر اللحظات الجميله و الشاعريه في امم افريقيا

كرة القدم المصريه بتشهد النهارده حدث تاريخي بكل المقاييس !

النادي الاهلي وافق اخيرا علي عرض برشلونة الاخير بخصوص حمزه عبد الكريم و بكدة رسميا حمزه عبد الكريم اصبح لاعب في صفوف برشلونة !

لو عايز تعرف قيمه حمزه عبد الكريم فعلا شوف برشلونة عمل ايه عشان يتعاقد معاه ، برشلونة زود قيمه خيار الشراء بعد انتهاء الاعاره من 1.25 الي 1.5 مليون يورو ، كمان زود المكافآت من 3 الي 5 مليون يورو ، كمان زود نسبه اعاده البيع من 10% الي 15% !

الجميل بقي ان حمزه هينضم الي برشلونة اتليتك و مدربه هيكون بيليتي اللي كسب الثلاثيه الموسم الماضي مع برشلونة تحت 19 سنة ، حمزه كمان هيبقي عنده فرصه هايله انه يلعب و ياخد دقائق كتير بسبب اصابه مهاجمين الفريق ، فيكتور باربيرا و اوسكار جيستاو !

حمزه عبد الكريم هيبقي اول لاعب مصري يلعب في برشلونة ، سجل يا تاريخ

sportnews.it.com