ليلة عظيمه بكل المقاييس لشعب تونس العظيم
بدون اي مبالغات ، منتخب تونس قدم النهاردة اداء عظيم جدا في امم افريقيا !
منتخب تونس اكتسح النهارده منتخب اوغندا بثلاثيه مقابل هدف في امم افريقيا و تصدروا المجموعة التالته قبل مواجهه نيجيريا في الجوله القادمه !
منتخب تونس حقيقي محظوظ جدا ان مدربه هو سامي الطرابلسي ، الراجل ده عمل مباراة كبيره جدا و قدر ينظم تونس في كل مراحل اللعب و قدر يقرأ كل متغيرات المباراة ، ده غير ان رتم منتخب تونس في التحولات مرعب ولا يمكن ايقافه حرفيا !
منتخب تونس كسر العقده النهارده لان دي اول مباراة افتتاح يكسبها تونس في امم افريقيا من نسخه 2013 و كمان اصبحوا سادس منتخب في تاريخ امم افريقيا يسجل اكتر من 100 هدف
ليلة عظيمه بكل المقاييس ل شعب تونس العظيم
منتخب نيجيريا اثبت النهارده انه النسخه التانيه من منتخب مصر حقيقي !
منتخب نيجيريا فاز النهاردة علي منتخب تنزانيا بهدفين مقابل هدف في امم افريقيا في سيناريو كان ممكن ينكد علي نيجيريا النهاردة !
تخيل نيجيريا سجلت هدف في الشوط الاول بعد ما اوسيمين ضيع انفرادين و كمان ضيعوا فرصه في العارضه ، بعدها اوسيمين سجل هدف بالكعب في الدقيقه 47 لكن اتلغي ، راحت تنزانيا سجلت التعادل في الدقيقه 50 ، راح لوكمان سجل هدف ممتع بشماله في الدقيقه 52 و نيجيريا كسبت بالهدف ده !
المفارقه العجيبه بقي ان منتخب نيجيريا شبه منتخب مصر في كل حاجة ، عندهم هجوم قوي جدا ، اوسيمين و لوكمان و شيكويزيه و سيمون و ايوبي ، لكن دفاعهم من اضعف ما يمكن و ده السبب اللي خلاهم ميتأهلوش كاس عالم !
نيجيريا من الاخر مظبطين الجاكيته لكن البنطلون ضا رب منهم ، لقينا حد شبهنا اخيرا !
يا ساتر يا رب ، منتخب السنغال عمل النهاردة بدايه مرعبه حرفيا في امم افريقيا !
منتخب السنغال فاز النهاردة علي منتخب بوتسوانا بثلاثيه نظيفه في امم افريقيا في مباراة كان ممكن السنغال بسهوله يخلصوها بنتيجة عملاقه لولا حارس بوتسوانا اللي عمل 14 تصدي بحالهم ، متخيل الرقم !
المرعب بقي هي تشكيلة منتخب السنغال اللي مليانه نجوم مش عاديه ، تخيل ان خط هجومهم الاساسي هو ايلمان نداي نجم ايفرتون و اسماعيلا سار نجم كريستال بالاس و معاهم ساديو ماني و نيكولاس جاكسون اللي سجل هدفين النهاردة و اصبح هداف البطولة !
كل ده بقي كوم و مدربهم الجديد بابي ثياو كوم تاني ، الراجل ده عامل ديناميكيه عظيمه في حركه الكرة و اللا مركزيه بين اللاعبين و مديهم حريه كبيره لانهم حريفه ، تخيل ان الراجل ده لعب مع السنغال 11 مباراة رسميه و كسبهم كلهم و سجل 27 هدف و استقبل هدفين فقط ، يا ساتر فعلا !
منتخب السنغال بدون مبالغات منتخب مرعب و مرشح اول للفوز ب امم افريقيا
بدايه كاس الامم الافريقيه حقيقي مليانه مغامرات و مفاجات مش عاديه و شكلها كدة هتبقي بطوله للتاريخ !
المغرب امبارح بتضيع ركلة جزاء و بتسجل هدف اسطوري من ايوب الكعبي !
مالي و زامبيا كملوا الاثاره النهاردة و مالي ضيعت ركله جزاء في الشوط الاول و بعدها تقدموا بهدف في الدقيقه 61 و خلاص هيضمنوا الفوز و اول 3 نقاط !
راح ظهرلهم باتسون داكا من تحت الارض و سجل هدف التعادل ل زامبيا في الدقيقه 92 و لما جه يحتفل راح اتشقلب غلط و وقع علي وشه و اتصاب !
احداث و سيناريوهات عجيبه و احنا لسة في البدايه ، ما بالك بقي لما نطول شويه هيحصل ايه ، متعه الماما افريكا يا ساده
لو في شئ واحد هيخلي تنظيم المغرب ل امم افريقيا و كمان كاس العالم ينجح نجاح باهر بدون شك هتبقي جوده ارضيه الملاعب !
بالرغم من سقوط الامطار و السيول اللي حصلت امبارح في مباراة المغرب و جزر القمر الا ان ملعب الامير مولاي عبد الله متأثرش نهائيا و احتفظ بجودته ، طب ليه ؟
لان ببساطه عشب الملعب ده اتغير و اتعمل ب طبيعه هجينه ، عشب طبيعي علي الياف اصطناعيه عشان مقاومه الضغط تزيد و صرف المياه يكون افضل مع تكلفه و مده صيانه قليله !
منتخبات افريقيا كان بقالها نسختين في امم افريقيا بتلعب علي غيطان مش ملاعب ، المغرب السنة دي دخلت عليهم بشغل فاخر مش متعودين عليه و مبيتشافش غير في اوروبا حرفيا
المشهد الجميل اللي قدامك ده هو اجمل مشهد ممكن تشوفوا في امم افريقيا السنة دي !
الراجل الجميل اللي قدامك ده هو ” حسام الدين احمد ” و هو اعلامي من دوله جزر القمر العربيه ، الراجل ده بدأ مسيرته المهنيه في 2017 ، بدأ كمراسل و مقدم برامج لحد ما اثبت نفسه و نجح و اصبح رئيس القسم الرياضي و جمعيه الصحفيين الرياضيين في جزر القمر !
الجميل في الراجل ده انه وضح رسالته الاعلاميه قبل كدة و قال ان هدفه هو تعزيز السلام في المجتمع و فعلا كل برامجه اللي قدمها كان بيعمل فيها ده ، ده غير انه اشتغل مدرس في مدارس ابتدائيه لان كان عنده رغبه في مساعدة الاطفال على التطور !
الجميل بقي ان حسام ظهر للنور في كاس العرب اللي فات و انضم لقنوات الكاس لتغطيه البطولة و النهارده انضم رسميا الي قنوات بي ان سبورت لتغطيه كاس الامم الافريقيه و ظهر النهاردة في الاستوديو التحليلي بعد مباراة المغرب و جزر القمر !
ليلة عظيمه لشعب تونس العظيم
ليلة عظيمه لشعب تونس العظيم
اترك تعليقاً