هيرفى رينارد كبش فداء لفشل منظومه كامله

رسميا رحيل هيرفى رينارد عن تدريب المنتخب السعودى

أوقات كتير جدًا المدرب بيبقى كبش فداء لفشل منظومة كاملة، وده واحد من أكتر السيناريوهات المتكررة في كرة القدم، وده بالضبط اللي حصل مع هيرفي رينارد بعد إقالته النهارده عقب الخروج من كأس العرب على يد المنتخب الأردني.

لو بصينا بهدوء على المنتخب السعودي الحالي، وقارناه بمنتخب من سنتين أو تلاتة تحت قيادة رينارد نفسه، هنشوف فرق شاسع وواضح جدًا، وده مش بسبب إن المدرب اتغير أو فقد أدواته، لكن بسبب تغير الظروف والمنظومة اللي حواليه.

أهم سبب في التراجع ده إن اللاعب المحلي السعودي فرص مشاركته قلت بشكل ملحوظ، وبقت الأولوية شبه دايمًا للاعبين الأجانب اللي دخلوا دوري روشن بأرقام وملايين ضخمة.

اللاعب المحلي اتهمش، احتكاكه قل، مشاركاته قلت، وطبيعي جدًا
مع الوقت مستواه ينخفض، بل إن في لاعيبة فقدت الشغف أصلًا بسبب غياب الفرص والاستمرارية.

دوري روشن والكم الكبير من النجوم اللي دخلوا الدوري كان ليه تأثير جماهيري وتسويقي قوي، لكن فنيًا تأثيره على المنتخب ظهر بالسلب.

النقطة دي أتكلم عنها مانشيني قبل كده، ورينارد نفسه لمح لها أكتر من مرة، إن الوضع بالشكل ده هيأثر على تكوين جيل جديد، ومش هيساعدك تخرج لاعيبة جاهزة تشيل المسؤولية بعد الجيل الحالي اللي أعمار لاعيبته بتقرب من نهاية مشوارهم الكروي.

في النهاية، رينارد ببساطة حاسب على أخطاء منظومة كاملة مش بتاعته، وشال الليلة كلها لوحده رغم إن المشكلة أعمق وأكبر من إسم مدرب.

هو في حد ممكن يختلف ان هيرفي رونار واحد من أنجح مدربي المنتخبات في العالم أخر ١٥ سنة

الراجل نجح في اربع منتخبات مختلفة ودي مش سهلة ابدا

٢٠١٠ فى أقوى مجموعة في البطولة طلع أول على الكاميرون وتونس وخرج بالعافية فى الربع النهائي من نيجيريا بلينات

٢٠١٢ جاب البطولة لأول مرة فى تاريخ زامبيا ضد دروجبا ف نهائي تاريخي

٢٠١٥ جاب أمم أفريقيا لأول مرة من ٢٣ سنة ساحل العاج

٢٠١٧ المغرب صعد بيهم كأس العالم لأول مرة من ٢٠ سنة وعمل بطولة عالم ممتازة وكان يستاهل يصعد

وبرضوا ٢٠١٧ لعب بطولة أمم أفريقيا ممتازة وكان أقوى فريق كرة قدم فى البطولة

مع السعودية مرتين صعد كأس العالم و ونصف نهائي كأس العرب

عمل ماتشات تاريخية ضد البرتغال و إسبانيا و الارجنتين

مسيرة فيها لقبين أمم أفريقيا و تلت مرات كأس العالم وماتشات تاريخية

sportnews.it.com