اعتذار وسام ابو علي للاهلى وجماهيره اليوم / رسميا وسام ابو علي صفحه وانتهت بالنسبه للاهلى المصرى

وسام ابو علي طلع في فيديو و اعتذر لجمهور الاهلي عن الطريقه اللي قرر يمشي بيها من الاهلي و اعترف انه كان غلطان

و قال انه مش موافق ان اي لاعب تاني في النادي يعمل اللي هو عملوا !

وسام قال برضه ان النادي الاهلي هو اللي طلعوا لفوق و خلاه نجم و وصلوا للاحتراف و خلاه يعيش احلي سنة و نص في حياته

و من غيره مكنش هيقدر يلعب كاس العالم للاندية !

الاهلي كسب حاجات كتير من تجربه وسام ابو علي

كسب من اللاعب نفسه سنة و نصف علي المستوي الفني و كسب حوالي 9 مليون دولار من بيع اللاعب

و الاهم انه كسب انضباط الفريق كله ، اللي عايز يمشي حقه عادي بس مش بمزاجه ولا بشروطه ولا بالضغط

طالما عقدك لسة طويل ، النادي هو اللي يمشي اموره و يحكم في امر المفاوضات ، وسام نفسه اللي عمل الغلطه بيقول لكل اللاعبين متعملوش زيي !

صفحه وسام ابو علي مع الاهلي انتهت رسميا و الاهم دلوقتي ان الاهلي يعمل لجنه كشافين علي اعلي مستوي

و يستخدم الفلوس اللي خدها من وسام صح عشان يقدر يجيب مهاجم و اتنين و تلاته زي وسام و اعلي كمان

فنياً خسارة الاهلي لوسام ابو علي مش هتكون سهلة وسام كان مهاجم لُقطة امكانيات ضخمة وتقنية هائلة برقم اقل من قيمتها بكثير

هداف قوي target man مثالي معدلات مساهماته مقارنة بمعدلات مشاركاته كانت موضحة الفارق المهول بينه وبين مهاجمي الدوري

في نفس الوقت مالياً الاهلي هيحقق كتير اوي من وراه يمكن الرقم يكاد يقترب من مكاسب الاهلي المادية من وراء مشاركته في المونديال

النقطة هنا في التعويض صحيح هيبقى معاك فلوس اكتر بكتير جداً من اللي كانت معاك وإنت بتشتري وسام

بس السؤال هل هتلاقي نفس بروفايل او جودة وسام دلوقتي زي ما لقيت وإنت بتشتريه ؟

زيادة السيولة هتوسع دائرة البحث في مستويات عالية طبعاً بدل ما كنت بتدور في السويدي والنرويجي

هتقدر تدور في بلجيكي وسويسري وممكن برتغالي وتركي وربما اكثر لو حبيت فإنت ممكن تشتري دماغك وندفع رقم وتجيب حد تقيل مضمون

بس هرجع وأقول وسام كان لُقطة سر النجاح هنا انك تعرف تجيب لُقطة زيه من غير بعزقة في الـ7 والا الـ8 مليون اللي هييجوا من وراه

معادلة مش هتكون سهلة .. عايزة تيم سكاوتينج شاطر عنده بدايل زي وسام ..

لو لسه ناس زي سامح والغنيمي بيتم الاستفادة منهم يبقى السنارة هتغمز لانهم ناس شاطرة .. لكن السنارة لو مغمزتش بلاعب لُقطة زيه

وقتها هتضطر تبعزق وتشتري بالغالي وتلاقي نفسك بتعوض جودة وامكانيات وسام ببديل جديد بنفس الليفيل .. لكن اغلى

الاهلي لعب النهاردة اول مباراه وديه استعدادا للموسم الجديد

و قدر يكسب الملعب التونسي بنتيجة 4 / 1 بس سيبك من النتيجة خالص لان الاهلي فعلا معاه مدرب محترم جدا

و مليان تفاصيل و عنده كم افكار لا حصر لها !

ريبيرو النهاردة قدر يوظف كوكا كلاعب وسط بين المدافعين عشان يوسع الملعب اكتر و يدي مدي تمرير علي اطراف الملعب

و كان بيحمل اللعب في الجبهه الشمال ب اتنين نص ملعب زي افشه و بن رمضان و معاهم بن شرقي و كريم فواد

و بيخلي طاهر يضم من الطرف للعمق تحت المهاجم و يبقي مهاجم تاني و يكسب الكرات التانيه

بالفكرة دي قدر يسجل هدفين !

ريبيرو في الشوط التاني قدر يستخدم الظهير الايسر محمد شكري كلاعب وسط اضافي داخل الملعب بيتحرك عموديا

و يسحب جناح المنافس لجوة و يفضي زاويه التمرير للجناح تريزيجيه علي الخط اللي بيسحب الظهير

عشان شكري يكمل في المساحه وراه ، بالفكرة دي قدر يسجل هدف !

الراجل ده مخه نضيف جدا و لو الاهلي ادالوا وقته فعلا هيقدر يبني فريق ممتاز

الاهلي هيستفيد منه في المستقبل مش بس دلوقتي

Sportnews