خوليان الفاريز عقليه مثاليه بمعني الكلمة

احنا محتاجين نقف شويه عند التحفه الفنيه اللي قدمها خوليان الفاريز النهاردة امام برشلونة !

انت متخيل ان اتليتكو مدريد النهاردة استمر 24 دقيقه متواصله بيدافع و بيستقبل فرص من برشلونة ، اللي هو خلاص مستني الهدف يدخل مرماه في اي وقت !

فيظهر خوليان الفاريز من العدم و يقود مرتده و يعمل تمريره بينيه عظيمه يصنع منها انفراد ل سيميوني و يتسبب في طرد كوبارسي و هو بنفسه اللي يسدد الفاول فيسجل هدف خيالي و اتليتكو يخرج من الشوط الاول كسبان نتيجه و زياده عدديه ، متخيل التحول المرعب اللي صنعه الفاريز !

و لو عايز تنبهر ب الفاريز اكتر فالراجل ده طلع قال من فتره انه مكنش بيعرف يسدد فاولات ف قرر يتعلمها من ميسي في تدريبات منتخب الارجنتين ، الفاريز قال انه راقب اختيار ميسي لزاويه التسديد و راقب كيفيه تسديد الكرة بمساحه محدده من القدم عشان يحقق الانحناء المطلوب ، الفاريز وقتها قال انه سدد عشرات الفاولات و حلل كل فاول فيهم مع ميسي ، عشان تكون النتيجة ان الفاريز يسجل 5 اهداف من فاولات مع اتليتكو مدريد منها هدف النهارده امام فريق ميسي شخصيا !

لاعب كسب كل البطولات الممكنه في سن صغير و كان مرتاح في مانشيستر سيتي لكنه قرر يخرج برة دائره الراحه عشان يلعب اساسي و يثبت نفسه و كمان اتعلم من ميسي و قرر يطور من نواقصه

خوليان الفاريز عقليه مثاليه بمعني الكلمه

انا حقيقي مفيش حد صعبان عليا في مباراة برشلونة و اتليتكو مدريد غير قطعة الذهب اللي قدامك دي !

لامين يامال كان بيدي دروس في المسئوليه النهاردة لكل لعيبه العالم ، ولد صغير عنده 18 سنة لكن بجبروت رئيس اكبر شركة في العالم ، من الشوط الاول و هو مقرر يكسب المباراة دي بأي تمن !

في الدقيقه 31 دخل لوحده وسط 3 مدافعين و كروتهم كلهم في اضيق مساحه ممكنه لكن الفينيش مظبطش ، في الدقيقه 37 نزل للتلت الاوسط و كسر الضغط و عمل سويتش عظيم ل راشفورد اللي كالعاده ضيع الفرصه ،

في الدقيقه 49 و في وسط ما برشلونة بيلعب ب 10 لاعبين نزل للعمق و عمل ثرو خيالي صنع منه انفراد ل راشفورد لكن كالعاده ضاعت الفرصه !

لاعب واحد عنده 18 سنة صنع 3 فرص و عمل 8 مراوغات صحيحه و استرجع الكرة 8 مرات و دخل 24 ثنائيه كسب منهم 16 ، لا استوعب معايا الرقم معلش ، دخل يلتحم 24 مرة ، دخل الخناقه لوحده بدون مبالغات !

المشهد ده فعلا يزعل ، نفس مشهد مباراة انتر بالحرف ، يامال عمل كل حاجة في الكورة و خسر في الاخر و حط وشه في الارض لانه بيلعب مع اشباه لاعبين بيضيعوا كل مجهوده !

انا حرفيا مشوفتش نادي حظه منيل بالشكل ده في دوري ابطال اوروبا قد برشلونة !

يعني برشلونة من الدقيقه 20 و هو مهيمن تماما علي اتليتكو و رافع الرتم و راشفورد ضيع فرصتين و كان خلاص قربوا يسجلوا هدف ، فجأه من لا شئ الفاريز يصنع انفراد ل سيميوني و كوبارسي و هو بيجري وراه ف يخبط في رجله و يتطرد لان القانون بيقول كدة !

لا و ايه بقي ، ده مش مجرد طرد ، ده الفاريز سجل هدف من الفاول ده كمان ، اللي هو من فريق كان هيسجل خلاص الي فريق بيخرج خسران و بيكمل المباراة ب 10 لاعبين ، سيناريو مرسوم مخصوص عشان برشلونة !

مش بس كدة ، ده بيدري خرج و ليفاندوفسكي خرج و فيرمين نزل لعب جناح و راشفورد لعب مهاجم ، يعني لا مهاجم ولا جناح و يامال كمل يلعب لوحده و برغم ذلك راشفورد ضيع انفراد ميضيعش و بعدها سدد فاول في العارضه ،

عشان ترد بهدف تاني ل اتليتكو و برشلونة يخسر بسيناريو صورة طبق الاصل من مباراة باريس في 2024 !

اراخو بيتطرد في مباراة باريس ، كوبارسي بيتطرد في مباراة بنفيكا ، اراخو بيتطرد في مباراة تشيلسي ، كوبارسي بيتطرد في مباراة اتليتكو ، علاقة برشلونة مع دوري ابطال اوروبا علاقة توك سيك بالمعني الحرفي !

sportnews.it.com