اندوني ايراولا مدرب عظيم

الواحد حقيقي منبهر بالكورة النضيفه اللي بيقدمها اندوني ايراولا مدرب بورنموث !

يعني الراجل ده النهاردة كان داخل مذاكر ارسنال ، وظف اتنين لعيبه يراقبوا رايس و زوبيميندي في العمق ، وظف تافيرنير بمراقبه هافيرتز بين الخطوط ، ترك بن وايت بدون رقابه لانه اقل حلقه في الخروج بالكرة عشان يكسب لاعب زياده في الخلف و هو سينسي !

ف ارسنال ملاقاش حلول غير انه يلعب كرات طويله من رايا علي جيوكيريس و كالعاده بيخسر التحامات هوائيه ، يا اما رايا يمرر ل بن وايت الحر ، تافيرنير يسيب هافيرتز و يرحل و يضغط عليه ، سينسي الحر يستلم هافيرتز بين الخطوط ، شكرا قفلتها عليك !

الجميل بقي ان اندوني ايراولا راح بنفسه حضر مباراة ارسنال و ساوثهامبتون في الكاس و لما اتسأل من الصحفيين عن السبب قالهم انا متعود اعمل ده من ساعه ما كنت بدرب رايو فاييكانو لان المشاهده من الملعب بتخليني اجمع معلومات اكتر ، اجتهاد يحترم جدا !

الشئ المبهر بقي ان اندوني ايراولا مخسرش في اخر 12 مباراة في الدوري و دي اعلي سلسله لا هزيمه في الدوري و حاليا هو في المركز التاسع و قريب جدا من المراكز الاوروبيه بالرغم اداره بورنموث باعت كيبا و هاوسين و سابارني و كركيز و سيمينيو و دانجو واتارا ، ده غير اصابه جاستن كلويفرت ،

مدرب عظيم بكل معني الكلمه

مفيش كلام يتقال فعلا غير ان ارسنال مصمم يعيش فيلم الف مبروك بتاع كل سنة !

بورنموث النهاردة قدم هديه عظيمه لمانشيستر سيتي لانه فاز علي ارسنال بهدفين مقابل هدف في مباراة بتثبت للمرة المليون ان ارتيتا مش قادر يقاوم عقدته السنويه في اخر شهرين من الموسم و مصدر كميه توتر غير عاديه لفريقه !

يعني ارسنال النهاردة حرفيا مقدمش اي حاجة ليها علاقه بالكورة لدرجة ان ارتيتا بدأ ب هافيرتز بين الخطوط مكان ايزي و تافيرنير كان بيراقبه بسهوله في العمق و رايا ملاقاش حلول غير انه يلعب كرات طويله علي جيوكيريس اللي خسر كل الالتحامات كالعاده ، مش منظر فريق عايز يكسب دوري ابدا !

انا بجد مش عارف ارسنال عايز ايه تاني عشان يحسم الدوري ، ليفربول وقع و مانشيستر سيتي ضيع كميه نقاط غير عاديه ، ارتيتا بقي مستغلش كل ده و فضل مصمم علي اسلوب لعبه الحريص اللي فعلا مبيأكلش عيش و محجم كل لعيبته في الملعب !

الجنان بقي ان الفارق بين ارسنال و مانشيستر سيتي حاليا هو 9 نقاط لكن السيتي لسة عنده مباراتين ناقصين و لو كسبهم هيبقي الفارق 3 نقاط و لو كسب ارسنال الاسبوع الجاي هيتصدر الدوري بنفس النقاط مع ارسنال ، السيناريو ده لو حصل جمهور ارسنال هيعتزل مشاهده الكورة حرفيا !

ارسنال يفقد بطولتين فى أسبوع وفى طريقه لخساره الدورى الانجليزى

الواحد مش عايز يبالغ ، بس مباراة برينتفورد و ايفرتون اللي خلصت دلوقتي تصنف من امتع مباريات الموسم في الدوري الانجليزي حقيقي !

الفريقين مش مجرد لعبوا مباراة كبيره ، دول لعبوا نهائي فعلا من كتر التنافس و الدراما اللي حصلوا ، مباراة رايحه جايه ، هجمه هنا و هجمه هنا ، ده بيندفع و بيضغط و يهاجم ، و التاني يرد عليه بنفس الاسلوب !

ايجور تياجو سجل ، يرد عليه بيتو بالتعادل ، ايجور تياجو سجل التاني في الدقيقه 76 ، ايفرتون فضل يلعب علي شرفه و شخصن الموضوع و سجل التعادل في الدقيقه 91 !

مباراة فيها 4 اهداف و 31 تسديده و 6 فرص محققه و كورتين في العارضه و كيليهير و بيكفورد كانوا بيردوا علي بعض بتصديات مبهره !

التعادل ده خدم ليفربول و تشيلسي اللي لو فازوا الاسبوع ده هيفرقوا اكتر و هيقربوا من التأهل الاوروبي و لك ان تتخيل ان في 7 انديه بحالهم بيتخانقوا علي المركز السابع المؤهل لدوري المؤتمرات لان الفارق بين المركز السابع و ال 13 هو 5 نقاط فقط ،

متعه البريميرليج سابقه عن الكل

sportnews.it.com