انا مش عارف كام واحد عارف المعلومة دي ؟

بس بالدي ساهم ب 9 اهداف الموسم ده مع برشلونة

و ده اعلي معدل مساهمات ل بالدي في موسم واحد ! 😮

بالدي النهاردة امام اوساسونا قدم اداء مثالي ، اداء يقولك اننا قصاد امكانيات كبيره جدا !

و صنع هدف ، صنع 3 فرص ، كل مراوغاته ناجحه

كل تدخلاته ناجحه ، استرجع الكرة 6 مرات ، كسب 4 ثنائيات من اصل 5 !

وكمان اللي يوضحلك ان امكانيات بالدي كبيره جدا هي استخدام فليك لي في الملعب

فليك مخلي بالدي يشيل الخط الشمال كله لوحده

هو الجناح المقابل ل لامين يامال

طب ليه فليك عمل كدة ؟ 👇

اولا لان بالدي قادر يحمل الكرة عموديا لمسافات طويله

ثانيا لان بالدي مراوغ عظيم في مواقف ال 1vs1

ثالثا وكمان بالدي حركيته فوق الممتازه

رابعا لان بالدي لمسته الاولي و الاخيره للكرة ممتازه

خامسا

لان بالدي قادر يخرج بالكرة تحت الضغط في مساحه ضيقه

هانز فليك قدر يحول بالدي من ظهير جمهور برشلونة كان فاقد الامل فيه الموسم الماضي

الي افضل ظهير ايسر في العالم الموسم ده 👏❤️

الركض التقدمي بالكرة progressive ball carrying

مهارة بيستخدمها اي لاعب عنده تحكم مميز بالكرة في انه يركض بيها مسافات عمودية طويلة

من المناطق الخلفية لمناطق الخصم

واحدة من اقوى الطرق التقنية لكسر الضغط العالي واختصار مرحلتي التحضير وتطوير الهجمة

وبتسهل كتير من سلاسة حيازة الفريق

و المهارة اللي بيقدمها بالدي من بداية الموسم مع برشلونة وسبب رئيسي في تميز برشلونة

في التقدم بالكرة لمناطق للخصوم

حرفياً افضل لاعب في العالم بيعملها دلوقتي وبيعملها مرة او مرتين كل ماتش تقريباً ..

ده ناهيك عن كونه الجناح الايسر الحقيقي للفريق

ماكينة صناعة فرص وماكينة مراوغات ناجحة

وايقاع لعبه السريع بيصعب اي حد انه يوقفه ويتعامل معاه بحدة بدنية

موسم ضخم لبالدي !♥️

فريقه ملحقش يرتاح من التوقف الدولي !

بيلعب من غير رافينيا و كوبارسي !

اتصاب منه اولمو في المباراة !

هانز فليك ركن كل الظروف دي علي جنب و نزل اكتسح اوساسونا كإنه في حصه تدريبيه

و خلص المباراة من الشوط الاول باداء مثالي ! 😮

سجل 3 اهداف و صنع 6 فرص محققين للتسجيل و سدد كورة علي العارضه و استحواذ 74% ، قلبها حفله عليهم !

واصبح برشلونة متصدر الليجا بفارق 3 نقاط كاملين عن ريال مدريد

و برشلونة اقوي هجوم في الليجا ب 78 هدف في 28 مباراة

برشلونة صنع 129 فرصة محققه في الليجا في 28 مباراة

كل ده في موسم معملوش فيه غير صفقه واحدة فقط !

كل ده بسبب العبقري اللي قدامك في الصورة ده ، هانز ديتر باشا فليك ❤️

متنساش الموهبه بيدرى

القرارات اللي احنا فاهمين وعارفين كويس انها بتحتاج فترة زمنية محددة للتنفيذ بجودة كويسة

بيجي بيدري ينفذها في زمن اقل بكتير وبدقة وجودة مهولين !!.

يعني تخيل انت عشان تستلم وترفع عينك وتطلع زميلك في موقف انفراد كل ده ممكن ياخد منك ثواني.

لا لا بيدري حرفياً تحس ان المسح البصري عنده شغال بكاميرا 360

وعارف سلفاً تحرك زميله في المساحة دي فيروح من لمستين مطلعه انفراد عادي !

القصة مش بس في جودة قرارات بيدري ..

القصة في سرعة تنفيذها وتنفيذ كل المتطلبات التقنية الخاصة بكل قرار عشان تكون جودته بالشكل المبهر ده

بيدري جودته استثنائية حقيقي متقدرش تغمي عينك عن ده ..

في حضرة لاعب لو الاصابات مكنتش عطلته كان زمانه في مستويات تانية خيالية كمان !

مخدش ثانيتين علي بعض عشان يستلم و يلف و يرفع عينه

و يعمل تمريره بينيه مظبوطه و مفهاش غلطه تكسر خطين ضغط ب 9 لاعبين كاملين و يصنع حدث نتج عنه هدف !

بيدري معندوش موقف في الملعب ملوش حل ، كل المواقف بيتصرف فيها بمثاليه

و بيحسسك ان الامر سهل دايما بس هو بيضحك عليك !

لان الامر معقد جدا ، بس هو شغلته في الكورة انه يبسطلك كل ما هو معقد و دي اصعب شغلانه في الكورة !

اهو بيدري ده هو وسيله الترفيه اللي يستاهل يتدفع فيها فلوس

لانك ضامن مليون في المئه انك هتستمتع ! ❤️

ملحوظه فرانكي دي يونج لو استمر علي الفورمه دي هيفرق جدا في اخر شهرين من الموسم مع برشلونة

دي يونج بفورمته لاعب تقيل جدا

بالدي كل مباراة ورا التانيه بيثبت انه رجع بالدي بتاع موسم ٢٢ / ٢٣

بالدي مع فليك موسمه حتي الان ممتاز

ترتيب الليجا الان

متبقي 10 مباريات فقط

حتي اذا فاز الريال علي البرسا في الكلاسيكو يظل برشلونة متصدر

اتليتكو بعد تماما عن المنافسه…