اهم صفقه عملها ريال مدريد حرفيا هويسين

من بعد سيرجيو راموس ، ريال مدريد حرفيا مكنش يعرف يعني ايه مدافعين

لحد ما وصل العبقري ده !

الولد ده مبهر بشكل مش طبيعي ، فكرة ان مدافع بيقدر يكسر خطوط الضغط بالتمرير

و برجليه الاتنين و بسهوله تامه و مع مختلف السياقات دي اسمها مثاليه !

فكرة ان في مدافع قادر يوهم المنافسين باتجاه لعب و يقدر يراوغ و يشيل الكرة

و يجري بيها لمسافات طويله دي اسمها مثاليه !

فكرة ان في مدافع قادر يكون صانع العاب فريقه و يعمل تمريرات بينيه خلف المدافعين بوزن

و اتجاه مفهمش غلطه دي اسمها مثاليه !

هويسين النهاردة عمل تمريره خلف المدافعين لفينيسيوس جه منها الهدف التالت لريال مدريد

و في لقطه تانيه منع انفراد صريح ل باتشوكا بذكاء كبير ، دي مجرد البدايه بس !

هويسين هو اهم صفقه عملها ريال مدريد حرفيا

في الشوط الاول دخل عليه اتنين لعيبه في مساحه كبيره و قدر بذكاء و هدوء

و بوضعيه جسديه ممتازه يخلي حامل الكرة يطمع يكمل بالكرة لبرة

فى كدة وجهوا لبرة بعيد عن حلق المرمي كدة اول مبدا

تاني حاجة حافظ انه يكون قريب من اللاعب التاني اللي جوة بوضعيه جسديه خارجيه تري الكرة

و بجسم مقوس بحيث يقفل زاويه التمرير علي اللاعب التاني و يواجه برضه اللاعب الاول

قدر في النهايه يقطع مسار التمرير و كسب الكرة بدل ما تتحول هدف ل باتشوكا

اللقطه في الدقيقه ١٧ للي عايز يشوفها تاني

الحاجات دي بتاعه فان دايك و اللي معظم الجمهور بيتريق فيها عليه انه مدافع بيخاف

و مبيضغطش و الكلام الغريب ده.

هويسين ناقل جودة ريال مدريد بالكرة لمستوى تاني خالص

تمريرات هادية وذكية وهدوء غريب تحت ضغط وتمريراته الطويلة والقطرية حلويات

غير كده دفاعياً هو وحش صراعات وابعادات وكمان افتكاكاته كلها ممتازة

اضافة مش واخدة حقها خالص في الريال وهيبقى لاعب له دور ضخم في الموسم الجديد

انا عارف ان كورتوا شال مباراة باتشوكا النهاردة

لدرجة انه عمل 10 تصديات و منع 1.68 هدف زياده كان المفروض ريال مدريد يستقبلهم !

بس عايزك تحط نفسك مكان الونسو كدة ، بلعب اول مباراه امام الهلال و متقدم في النتيجة

فجاة اسينسيو يعمل ركلة جزاء ملهاش لازمه و فالفيردي يضيع ركلة جزاء و اتعادل !

و النهاردة امام باتشوكا لسة بيقول يا هادي ، راح اسينسيو عمل غلطه ملهاش لازمة في اول 7 دقائق و اتطرد

و ريال مدريد كمل المباراة ب 10 لاعبين !

بالرغم من كل ده الا ان الونسو قدر يتعامل مع الوضع بشكل ممتاز ،

حرك تشواميني من نص الملعب الي الدفاع ، جاب جولر من الجناح لوسط الملعب

ملعبش بجناح يمين ، اعتمد يلعب علي جونزالو جارسيا و يطلع بفكرة الرجل التالت في المساحه

عن طريق فالفيردي و بيلينجهام القادمين من الخلف و طرفين بيتحركوا بشكل متاخر زي ارنولد و جارسيا

و سجل هدفين بالطريقة دي و هو ناقص لاعب !

في الشوط التاني باتشوكا لعب ربع ساعه مثاليه و كان سهل يسجل هدف و اتنين

الونسو قرا المشهد ان فريقه مش قادر يطول فتره استحواذه علي الكرة و سايبها تماما لباتشوكا

راح في الدقيقه 59 طلع بيلينجهام و جولر و نزل لعيبه وسط قادره تتحكم في الرتم و تقف علي الكرة اكتر

زي مودريتش و سيبايوس و فعلا بدا يطول فتره استحواذه علي الكرة و سجل التالت و خلص المباراة

اللي عايز اقولوا ان الونسو لسة قدامه تحديات كبيره

تحدي قرارات ساذجه من بعض اللاعبين ، تحدي نواقص زي لاعب وسط شامل و ظهير ايسر

تحدي الامور الدفاعيه و ان الفريق ده غير مؤسس علي الضغط بحده كبيره

فى بيستقبل تمريرات مكثفه خلف خط دفاعه بسهوله !

شغل الونسو هيظهر اكتر مع الوقت خصوصا ان اللاعبين مبسوطه و منسجمه معاه

لعيبه زي بيلينجهام و جولر بيطلعوا يقولوا النهاردة الونسو بيتكلم معانا كتير و احنا حاسين اننا لعيبه مهمه

و عنده افكار كتير خاصه بالهجوم و الدفاع !

الونسو كان محتاج الفوز ده النهاردة عشان الفريق يثق اكتر في عمله

و هو نفسه يشيل كل الشكوك و الضغوطات من عليه خصوصا بعد تعادل مباراة الهلال

مباراة ممتازة من الونسو

نطاق الرياضة